2026-27 துலீப் டிராபி தொடருக்கான கிழக்கு மண்டல அணியின் துணை கேப்டனாக வைபவ் சூர்யவன்ஷி நியமிக்கப்பட்ட விவகாரம் குறித்து முன்னாள் இந்திய கிரிக்கெட் வீரர் வசீம் ஜாபர் தனது கருத்தை தெரிவித்துள்ளார். இந்த தொடர் ஆகஸ்ட் 23 அன்று தொடங்க திட்டமிடப்பட்டுள்ளது.
ஜூலை 29 அன்று அறிவிக்கப்பட்ட கிழக்கு மண்டல அணியில், இஷான் கிஷன் கேப்டனாகவும், வைபவ் சூர்யவன்ஷி துணை கேப்டனாகவும் நியமிக்கப்பட்டனர். அணியில் அபிமன்யு ஈஸ்வரன் மற்றும் முகமது ஷமி போன்ற அனுபவம் வாய்ந்த வீரர்கள் இருந்தபோதிலும் இந்த நியமனம் பலரால் விவாதத்திற்குள்ளாக்கப்பட்டது.
தனது யூடியூப் சேனலில் பேசிய வசீம் ஜாபர், 'தேர்வாளர்கள் வைபவ் சூர்யவன்ஷிக்கு ஒரு பரிசை வழங்க விரும்பியிருக்கலாம். ஆனால் அவரது முதல்-தர கிரிக்கெட் சாதனைகள் மற்றும் ரஞ்சி டிராபி செயல்பாடுகளைப் பார்க்கும்போது, அவரது புள்ளிவிவரங்கள் இன்னும் அந்த அளவுக்கு சிறப்பாக இல்லை. எனவே, இந்த முடிவு நிச்சயமாக விவாதத்திற்குரியதுதான்' என்று கூறினார்.
வைபவ் சூர்யவன்ஷிக்கு இது ஒரு ஊக்கமளிக்கும் விஷயம் மற்றும் நல்ல அங்கீகாரம் என்றும் அவர் குறிப்பிட்டார். இருப்பினும், அபிமன்யு ஈஸ்வரனும் அதே அணியில் இருப்பதால், அவரை துணை கேப்டனாக நியமித்திருந்தால் அதுவே சரியான முடிவாக இருந்திருக்கும் என்றும் வசீம் ஜாபர் தனது கருத்தை வலியுறுத்தினார்.
அபிமன்யு ஈஸ்வரன் 113 முதல்-தர போட்டிகளில் விளையாடி 47.61 சராசரியுடன் 8,381 ரன்கள் குவித்துள்ளார். இதில் 36 அரைசதங்களும் 27 சதங்களும் அடங்கும். மேலும், உள்நாட்டு கிரிக்கெட்டில் பெங்கால் அணியை வழிநடத்திய சிறந்த கேப்டன்ஷிப் அனுபவமும் அவருக்கு உண்டு.
'அபிமன்யு ஈஸ்வரன் போன்ற ஒரு அனுபவமிக்க வீரர், இவ்வளவு கிரிக்கெட் விளையாடி, ஏற்கனவே பெங்கால் அணியின் கேப்டனாகவும் இருந்திருக்கும் போது, அவரை துணை கேப்டனாக நியமித்திருப்பது தான் பொருத்தமாக இருந்திருக்கும்' என வசீம் ஜாபர் தெரிவித்தார்.
இருப்பினும், இதை ஒரு பெரிய பிரச்சனையாக கருத வேண்டியதில்லை என்றும், இறுதியில் இஷான் கிஷன் தான் கேப்டனாக இருந்து அணியை வழிநடத்தப் போகிறார் என்றும் அவர் கூறினார். அதே சமயம், இந்த துணை கேப்டன் பதவி வைபவ் சூர்யவன்ஷிக்கு ஒரு கூடுதல் பொறுப்பாகவும், அவர் ஆவலுடன் எதிர்பார்க்க வேண்டிய ஒரு விஷயமாகவும் பார்க்கிறேன். அடுத்த இரண்டு அல்லது மூன்று ஆண்டுகளில், அவர் அணிகளுக்கு கேப்டனாகச் செயல்படுவதை நாம் பார்க்கலாம், ஏனெனில் அவரிடம் அதற்கான திறமை உள்ளது. அவர் சர்வதேச கிரிக்கெட்டில் விளையாடும் விதத்தைப் பார்க்கும்போது, அவருக்கு கேப்டன்ஷிப் வாய்ப்புகள் விரைவில் தேடிவரும் என்றும் அவர் நம்பிக்கை தெரிவித்தார்.
'இது பெரிய அளவில் கூச்சல் போட வேண்டிய ஒரு விஷயம் என்று நான் நினைக்கவில்லை. அவர் சிறப்பாகச் செயல்படுவார் என்று நான் நம்புகிறேன். என் கருத்துப்படி, இந்த கூடுதல் பொறுப்பு அவருக்கு மேலும் ஊக்கமளிக்கும்' என்று வசீம் ஜாபர் தனது பேச்சை நிறைவு செய்தார். கிழக்கு மண்டல அணி தனது முதல் போட்டியில் நார்த் ஈஸ்ட் ஜோன் அணியை ஆகஸ்ட் 23 அன்று பெங்களூருவில் எதிர்கொள்கிறது.
