கர்நாடக மாநிலத்தில் மூன்று தமிழர்கள் சித்திரவதை செய்யப்பட்டு, மிக அருகில் வைத்து துப்பாக்கிச்சூடு நடத்திக் கொல்லப்பட்ட சம்பவம் தொடர்பாக, சட்டசபையில் எதிர்க்கட்சித் தலைவர் உதயநிதி ஸ்டாலின் கவன ஈர்ப்புத் தீர்மானம் கொண்டு வந்து பேசினார். இந்தச் சம்பவம் குறித்து தமிழக அரசு என்ன நடவடிக்கை எடுத்துள்ளது என்றும், முதலமைச்சர் விஜய் இதுகுறித்து நேரில் கண்டனம் தெரிவித்தாரா என்றும் அவர் கேள்வி எழுப்பினார்.
கடந்த 15 ஆம் தேதி அதிகாலை, கர்நாடக வனத்துறையினரால் மூன்று தமிழர்கள் சுட்டுக் கொல்லப்பட்டனர். இந்தச் சம்பவம் ஏற்கனவே அவையின் கவனத்திற்கு கொண்டுவரப்பட்ட நிலையில், இன்று வெளியாகியுள்ள உடற்கூறாய்வு பரிசோதனை அறிக்கையில், அந்த மூன்று பேரும் சித்திரவதை செய்யப்பட்டு, மிக அருகாமையில் நிற்க வைத்து சுட்டுக் கொல்லப்பட்டிருப்பது தெரியவந்துள்ளது. மேலும், அவர்களுக்கு மிகக் கடுமையான காயங்கள் ஏற்பட்டிருந்ததாகவும், விலா எலும்புகள் முறிக்கப்பட்டிருந்ததாகவும் அறிக்கையில் குறிப்பிடப்பட்டுள்ளது. இது ஒரு முழுமையான படுகொலை என உதயநிதி ஸ்டாலின் குறிப்பிட்டார்.
இந்தச் சம்பவம் தொடர்பாக தமிழக அரசு என்ன நடவடிக்கை எடுத்துள்ளது என்றும், குறைந்தபட்சம் கர்நாடக அரசிடம் விளக்கம் கேட்டு கடிதம் அனுப்பியுள்ளதா என்றும் அவர் வினவினார். மேலும், கடந்த வாரம் நடைபெற்ற தென் மண்டல முதலமைச்சர்கள் மாநாட்டில், கர்நாடக முதலமைச்சரிடம் தமிழ்நாடு அரசு நேரடியாகக் கண்டனம் தெரிவித்ததா என்றும் அவர் கேள்வி எழுப்பினார்.
கர்நாடக மாநில காவல்துறைக்கு பதிலாக, ஒரு மேலிட விசாரணை நடத்த தமிழக அரசு வலியுறுத்த வேண்டும் என்று ஏற்கனவே கூறியிருந்த நிலையில், அது தொடர்பாக கர்நாடக முதலமைச்சரிடம் பேசப்பட்டதா என்றும் அவர் கேட்டார். இந்தச் சம்பவம் நடந்த உடனேயே, முதலமைச்சரோ அல்லது அமைச்சரோ பாதிக்கப்பட்ட குடும்பத்தினருக்கு ஆறுதல் கூறியிருக்க வேண்டும் என்றும், மூன்று தமிழர்களின் குடும்பங்களுக்குத் தேவையான நிதி உதவியையும், சட்ட உதவியையும் தமிழக அரசு செய்ய வேண்டும் என்றும் அவர் வலியுறுத்தினார்.
இதற்குப் பதிலளித்த சபாநாயகர், வனத்துறை மற்றும் சட்டத்துறை அமைச்சர்கள் ஏற்கனவே இதுகுறித்து பதில் அளித்துவிட்டதாகவும், பிரேத பரிசோதனை அறிக்கை குறித்த கேள்விகளுக்கு பதில் கிடைத்தவுடன் அளிக்கப்படும் என்றும் தெரிவித்தார். இந்தச் சம்பவம் தமிழகத்தில் பெரும் அதிர்வலைகளை ஏற்படுத்தியுள்ளது.
