கேரள மாநிலம் சங்கனாச்சேரியில் அமைந்துள்ள மெட்ரோபோலிட்டன் ஆலயத்தில் ஒரு அரிய நிகழ்வாக இரட்டை சகோதரர்களை இரட்டை சகோதரிகள் திருமணம் செய்து கொண்ட சம்பவம் பெரும் கவனத்தை ஈர்த்துள்ளது. இந்த திருமணத்தில் மேலும் ஒரு சிறப்பு என்னவென்றால், திருமணத்தை நடத்தி வைத்த பாதிரியார்களும், திருப்பலிக்கு உதவிய பீட சிறுவர்களும் கூட இரட்டையர்களாகவே இருந்ததுதான்.
சங்கனாச்சேரியை சேர்ந்த குஞ்சுமோன் தாமஸ் மற்றும் ஜோமோள் தம்பதியரின் மகன்களான அகில் மற்றும் நிகில் இருவரும் 29 வயதுடைய இரட்டையர்கள் ஆவர். இவர்கள் இருவரும் பத்தனம்திட்டா, குளத்தூரை சேர்ந்த டோமிச்சன் மற்றும் மேரி குட்டி தம்பதியரின் மகள்களான மாகி மேரி மற்றும் மரியா மேரி ஆகியோரை திருமணம் செய்து கொண்டனர். இதில், மாகி மேரியை அகிலும், மரியா மேரியை நிகிலும் கரம் பிடித்தனர்.
இந்த திருமணத்தின் முக்கிய சிறப்பம்சமாக, இரட்டையர்களாக பிறந்த காஞ்சிரப்பள்ளியை சேர்ந்த பாதிரியார்களான ஆன்றோ மற்றும் அஜோ ஆகியோர் திருமணத்தை நடத்தி வைத்தனர். மேலும், திருமண திருப்பலியின்போது உதவி புரிந்த வழிபாட்டு உதவியாளர்களான (பீட சிறுவர்கள்) ஜெரோன் ஜேம்ஸ் மற்றும் ஜோகன் ஜேம்ஸ் ஆகியோரும் இரட்டையர்களாக பிறந்தவர்கள் என்பது குறிப்பிடத்தக்கது.
மணப்பெண்களான மாகி மேரி மற்றும் மரியா மேரி ஆகியோர் சிறு வயதிலிருந்தே இரட்டையர்களை மட்டுமே திருமணம் செய்ய வேண்டும் என்ற உறுதியான விருப்பத்துடன் இருந்துள்ளனர். அவர்களின் இந்த விருப்பத்திற்கு ஏற்ப, இரட்டையர்களான அகிலும் நிகிலும் இவர்களுக்கு மணமகன்களாக அமைந்தனர். தொடர்ந்து, திருமணத்தை நடத்தி வைப்பதற்கு இரட்டையர்களான பாதிரியார்களையும், திருமணத்திற்கு உதவி செய்வதற்கு இரட்டையர்களான வழிபாட்டு உதவியாளர்களையும் மணமகள்களே நேரடியாக தேர்வு செய்துள்ளனர்.
இதனையடுத்து, இந்த அசாதாரணமான திருமணம் மிகுந்த கோலாகலத்துடன் அரங்கேறியது. இந்த திருமணம் உறவினர்கள், நண்பர்கள் மற்றும் அப்பகுதி மக்களின் பெரும் கவனத்தை ஈர்த்துள்ளது. இவர்களது திருமண புகைப்படங்கள் மற்றும் வீடியோக்கள் சமூக வலைதளங்களில் தற்போது வைரலாகி வருகின்றன.
தகவலின்படி, இரட்டை சகோதரர்களான அகில் மற்றும் நிகில் ஆகியோர் சரக்கு வணிக கப்பல்களில் பணிபுரிந்து வருகின்றனர். அதேபோல், இரட்டை சகோதரிகளான மாகி மேரி மற்றும் மரியா மேரி ஆகியோர் தகவல் தொழில்நுட்ப நிறுவனங்களில் பொறியியல் ஊழியர்களாக பணியாற்றி வருகின்றனர். இந்த திருமணம் பலரையும் ஆச்சரியத்தில் ஆழ்த்தியுள்ளது.
