தூத்துக்குடி மாவட்டம் ஸ்ரீவைகுண்டத்தில், புதிய பொறுப்புக்கு வந்த தவெக ஒன்றிய செயலாளர் தனது சகோதரருடன் சேர்ந்து கல் குவாரி உரிமையாளரிடம் பணம் கேட்டு மிரட்டல் விடுத்து, அலுவலகத்தில் உள்ள பொருட்களை அடித்து நொறுக்கிய சம்பவம் பெரும் பரபரப்பை ஏற்படுத்தியுள்ளது. ஸ்ரீவைகுண்டம் மேலப்பரம்பைச் சேர்ந்த பாலமுருகன், தவெகவின் ஒன்றிய செயலாளராகப் பொறுப்பு வகித்து வருகிறார். இவர் தனது சகோதரருடன் கடந்த சில நாட்களுக்கு முன்னர் பத்மநாபமங்கலத்தில் உள்ள ஒரு கல் குவாரிக்கு நேரில் சென்றுள்ளார். அங்கு குவாரி உரிமையாளரைச் சந்தித்து, சட்டவிரோதமாகப் பணம் கேட்டு மிரட்டல் விடுத்ததாகக் கூறப்படுகிறது. ஆனால், குவாரி உரிமையாளர் மாமூல் பணம் கொடுக்க மறுத்துவிட்டதாகத் தெரிகிறது. இதனால் ஆத்திரமடைந்த பாலமுருகனும் அவரது சகோதரரும், குவாரி அலுவலகத்தில் இருந்த கணினி, தொலைக்காட்சிப் பெட்டி (TV) மற்றும் வெளியே நிறுத்தப்பட்டிருந்த இருசக்கர வாகனம் ஆகியவற்றையும் அடித்து நொறுக்கி சேதப்படுத்தியுள்ளனர். இந்தச் சம்பவம் குறித்து கல் குவாரி உரிமையாளர் ஸ்ரீவைகுண்டம் காவல் நிலையத்தில் புகார் அளித்துள்ளார். புகாரின் அடிப்படையில், ஸ்ரீவைகுண்டம் காவல்துறையினர் பாலமுருகன் மற்றும் அவரது சகோதரர் மீது சட்டவிரோதமாக மிரட்டல் விடுத்தல், பொதுச் சொத்துக்களைச் சேதப்படுத்துதல் உள்ளிட்ட மூன்று பிரிவுகளின் கீழ் வழக்குப் பதிவு செய்துள்ளனர். மேலும், இருவரையும் கைது செய்வதற்கான நடவடிக்கைகளையும் மேற்கொண்டுள்ளனர். ஒரு அரசியல் கட்சியில் புதியதாகப் பொறுப்பைப் பெற்றுக்கொண்ட ஒருவர், தொழில் அதிபர்கள் மற்றும் வியாபாரிகளிடம் இதுபோன்று கட்டப்பஞ்சாயத்து மற்றும் பணம் கேட்டு மிரட்டலில் ஈடுபடுவது அப்பகுதியில் பெரும் அதிர்ச்சியை ஏற்படுத்தியுள்ளது. சமீப காலமாக, சில தவெக நிர்வாகிகள் மீது பாலியல் மற்றும் நில அபகரிப்பு போன்ற புகார்கள் தொடர்ந்து வெளிவந்த வண்ணம் உள்ளன. இந்தச் சூழலில், தற்போது நிகழ்ந்துள்ள இந்தச் சம்பவமும் சம்பந்தப்பட்ட கட்சித் தலைமைக்குக் கடுமையான தலைவலியை ஏற்படுத்தியுள்ளது.
