தூத்துக்குடி துப்பாக்கிச்சூடு சம்பவத்தில் தொடர்புடைய காவல் துறை அதிகாரிகள் மீது நடவடிக்கை எடுக்காதது திமுக அரசு என தமிழக அமைச்சர் ஆதவ் அர்ஜூனா குற்றம் சாட்டியுள்ளார். சட்டப்பேரவையில் உரையாற்றிய அவர், 'எதிர்க்கட்சித் தலைவர் எங்கள் முதலமைச்சருக்கு உபதேசம் செய்யத் தேவையில்லை. முதலமைச்சர் அவர்களை தயார்படுத்தியதால்தான் நீங்கள் எதிர்க்கட்சித் தலைவராக இன்று அமர்ந்திருக்கிறீர்கள். எங்களைப் பற்றி நீங்கள் பேசியிருக்கக் கூடாது. பேசியிருந்தால் வீட்டில் உட்கார்ந்திருப்பீர்கள்' எனத் தெரிவித்தார்.
மேலும் அவர், 'கொலையாளிகள் தங்கள் கொலையை மறைக்க முயற்சிப்பார்கள். கடந்த திமுக ஆட்சியில் ஒரு அரசே ஒரு கொலையை மறைக்க முயன்றது. கடந்த ஆட்சியில் வெளியான கொள்கை விளக்கக் குறிப்பில் இருந்து நான் படிக்கிறேன். தூத்துக்குடி துப்பாக்கிச்சூடு சம்பவத்தில் 17 காவல் துறை அதிகாரிகள் மீது நடவடிக்கை எடுக்க வேண்டும் என அருணா ஜெகதீசன் அறிக்கை அளித்தார். ஆனால், அதன் மீது ஏன் நடவடிக்கை எடுக்கப்படவில்லை? துப்பாக்கிச்சூட்டில் ஈடுபட்ட அதிகாரிகளை திமுக அரசு காத்தது. சம்பந்தப்பட்ட அதிகாரிகள் மீது துறை ரீதியான நடவடிக்கை எடுக்கவில்லை' என்றும் அவர் குறிப்பிட்டார்.
தொடர்ந்து பேசிய அமைச்சர் ஆதவ் அர்ஜூனா, 'நீட் தேர்வுக்கு எதிராகப் போராட வேண்டும் என்றால், திமுகவின் அறிவாலயத்தில் சென்று போராடலாம். ஏன் கம்யூனிஸ்ட் கட்சி அலுவலகத்தில் சென்று போராட்டம் நடத்த வேண்டும்? எம்எல்ஏ-க்கள் அனைவரும் ஒன்று சேர்ந்தால் தமிழ்நாட்டில் போதைப் பழக்க கலாசாரத்தை முடிவுக்குக் கொண்டு வந்துவிடலாம்' என்றும் அவர் கூறினார். இந்த கருத்துக்கள் சட்டப்பேரவையில் பெரும் விவாதத்தை ஏற்படுத்தின.
