திமுகவில் இணைய விரும்புவதாக முன்னாள் அமைச்சர் கே.என்.நேரு கூறியது முற்றிலும் கட்டுக்கதை என்று மதிமுக எம்பி துரை வைகோ திட்டவட்டமாக மறுத்துள்ளார். மேலும், திமுகவின் அச்சுறுத்தல்களுக்கு அஞ்சப்போவதில்லை என்றும், தன்னைத் தாக்கினால் இன்னும் தீவிரமாக அரசியலில் ஈடுபடுவேன் என்றும் அவர் ஆவேசமாகத் தெரிவித்தார்.
'கலைஞர் காலத்தோடு அரசியல் முடிந்துவிட்டது. இந்த உதயநிதி ஸ்டாலினை வைத்து எல்லாம் அரசியல் செய்ய முடியாது' என்று இன்றைய எதிர்க்கட்சி தலைவரைப் பற்றி கே.என்.நேரு பேசியதாக துரை வைகோ குறிப்பிட்டுள்ளார். இதுதான் கே.என்.நேருவின் போக்கு என்றும், இதற்கு மேல் பேச விரும்பவில்லை என்றும் அவர் கூறினார்.
தனது தந்தை வைகோவின் விருப்பத்திற்கு ஏற்ப அரசியலுக்கு வந்ததாகவும், நடிகர் அஜித் கார் ரேஸில் கலந்துகொள்வது தமிழ்நாட்டிற்கு சுற்றுலா மற்றும் முதலீடுகளைப் பெற்றுத்தரும் என்றும் துரை வைகோ தெரிவித்தார். தான் சிறுமைப்படுத்தும் அரசியலைச் செய்ய மாட்டேன் என்றும், ஆனால் பதிலுக்கு யாராவது அப்படிச் செய்தால், அதற்காக முழு நேரத்தையும் ஒதுக்கி செயல்படுவேன் என்றும் அவர் எச்சரித்தார்.
வேட்பாளராக அறிவிக்கப்பட்ட உடனேயே சூரியன் சின்னத்தில்தான் போட்டியிட வேண்டும் என அழுத்தம் கொடுக்கப்பட்டதாகவும், வேறு சின்னத்தில் நின்றால் திமுகவினர் ஒத்துழைக்க மாட்டார்கள் எனவும் கூறப்பட்டதாகவும் துரை வைகோ தெரிவித்தார். ஆனால், 'செத்தாலும் உதயசூரியன் சின்னத்தில் நிற்க மாட்டேன்' என்று அவர் திட்டவட்டமாக கூறியுள்ளார்.
திமுகவுடன் கூட்டணியில் இருந்தபோதும், இப்போதும் தன்னைப்பற்றி கீழ்த்தரமாகவும் அவதூறாகவும் பேசுவதாக துரை வைகோ குற்றம்சாட்டினார். திருவெறும்பூர் தொகுதியில் அன்பில் மகேஷ் தோல்விக்கு கே.என்.நேருவே முக்கியக் காரணம் என்றும், சொந்தக் கட்சியினரையே உள்குத்து வேலைகள் செய்து தோற்கடிக்கும் போக்கில் கே.என்.நேரு செயல்பட்டதால் அன்பில் மகேஷ் வெற்றி வாய்ப்பை இழந்தார் என்றும் அவர் கூறினார்.
'யாரும் என்னை மிரட்ட முடியாது. இந்தப் பண்ணையார் அரசியல் இதெல்லாம் என்கிட்ட நடக்காது. என்னை மதித்தால் மதிப்பேன்' என்று துரை வைகோ ஆணித்தரமாகத் தெரிவித்தார். மேலும், மு.க.ஸ்டாலினுக்கு அரசியல் தெரியாது என்றும், கலைஞர் காலத்தோடு அரசியல் முடிந்துவிட்டதாகவும் கூறியவர் கே.என்.நேரு என்றும் அவர் சுட்டிக்காட்டினார்.
