நடந்து முடிந்த சட்டமன்றத் தேர்தலில் திமுக 59 இடங்களில் வெற்றி பெற்றதில் வி.சி.க-வின் பங்கு மகத்தானது என்று அக்கட்சியின் தலைவர் திருமாவளவன் தெரிவித்துள்ளார். வி.சி.க-வின் வாக்குகள் த.வெ.க-வுக்குச் சென்றதால் திமுக தோல்வியடைந்ததாகப் பரப்பப்படும் தவறான தகவல்களை அவர் மறுத்தார். சென்னையில் நடைபெற்ற ஒரு நிகழ்ச்சியில் பேசிய திருமாவளவன், "வி.சி.க-வின் பங்களிப்பால் தான் திமுக 59 இடங்களில் வெற்றி பெற்றது. ஆனால், இதை யாரும் பேசுவதில்லை" என்று குறிப்பிட்டார்.
மேலும், "வி.சி.க-வின் வாக்குகள் த.வெ.க-வுக்குச் சென்றதால் திமுக தோல்வியடைந்ததாக தவறான தகவல்களைப் பரப்புகிறார்கள். வி.சி.க-வுக்குக் கிடைக்கும் முக்கியத்துவத்தை அவர்களால் தாங்கிக்கொள்ள முடியவில்லை. இதனால், விசிகவை உளவியல் ரீதியாகத் தனிமைப்படுத்த நினைக்கிறார்கள்" என்று அவர் குற்றம்சாட்டினார்.
தன்னைப் பற்றிப் பரப்பப்படும் வதந்திகள் குறித்தும் அவர் பேசினார். "எங்களை முதலமைச்சராக்குங்கள், துணை முதலமைச்சராக்குங்கள் என்று நாங்கள் கேட்கவில்லை. இப்போது நோபல் பரிசுக்கும் என்னை பரிந்துரைக்கிறார்கள், அதற்கு நான் என்ன செய்ய முடியும்? வைகோவிற்கு யுனஸ்கோ விருது கொடுக்கலாம். நாங்கள் வழக்கமான அரசியல் அணுகுமுறைகளைக் கடந்து, ஜனநாயகம் அடிப்படையில் செயல்பட்டு வருகிறோம்" என்று அவர் கூறினார்.
தமிழகத்தில் சட்டமன்ற, நாடாளுமன்ற தேர்தல்களில் திமுக, அதிமுக என இரண்டு அணிகள் எதிர்கொள்வதுதான் அரசியல் கலாச்சாரம் என்றும், மூன்றாவது அணியாகத் தோன்றும் கட்சிக்கு கடந்த 10 ஆண்டுகளில் வலிமை கிட்டவில்லை என்றும், ஆனால் தற்போது அது கிடைத்துள்ளதாகவும் அவர் தெரிவித்தார்.
காங்கிரசுக்கு எதிராக மாநிலக் கட்சிகளை வளர்த்துவிட்டு, பின்னர் அவற்றை அழிக்கும் வேலையை பாஜக செய்கிறது என்றும் அவர் விமர்சித்தார். "ஆர்எஸ்எஸ் பெற்ற பிள்ளை தவெக" என்று விமர்சனம் செய்த ஒருவர், ஏன் விஜய்க்கு ஆதரவு கொடுத்தார் என்று சிலர் கேட்பதாகவும், ஆனால் விஜயிடம் சென்று அவரை ஆர்எஸ்எஸ்-ன் பிள்ளை என திருமா விமர்சனம் செய்தபோது, ஏன் அவரிடம் ஆதரவு கேட்டீர்கள் என்று யாரும் கேட்கவில்லை என்றும் அவர் சுட்டிக்காட்டினார்.
திமுகவுடன் நட்பு என்று சொன்ன தன்னை விமர்சிப்பதாகவும், ஆனால் திமுகவை தீயசக்தி என்று சொன்ன விஜயை வீட்டில் வரவேற்றது ஏன் என்று யாரும் கேட்கவில்லை என்றும் அவர் கேள்வி எழுப்பினார். "பழைய உறவுகளை உதறிவிட்டு ஒட்டிக்கொள்ள முடியுமா?" என்று தான் கேட்டதில் என்ன தவறு உள்ளது என்றும் அவர் விளக்கம் அளித்தார்.
தான் 'பாலன்சிங்' ஆக அரசியல் செய்வதாகவும், கூட்டணி, தேர்தல், வெற்றி, தோல்வி பற்றி கவலை இல்லை என்றும் திருமாவளவன் கூறினார். தவெக ஆட்சி நியமனங்கள் அனைத்தும் தான் சொல்லி நடப்பதாகக் கூறுவதாகவும், தலித் அதிகாரிகள் நியமிக்கப்பட்டால் உடனடியாகத் தான் சொல்வதாக அர்த்தம் கொள்ள முடியாது என்றும் அவர் தெரிவித்தார்.
