கல்வியின் பெயரால் மாணவர்களின் மனதைச் சிதைக்கும் நீட் தேர்வுக்கு எதிராகக் குரல் கொடுத்திருக்கிறார் கவிஞர் வைரமுத்து. தேர்வு என்பதே மாணவர் மீது நிகழ்த்தப்படும் மனக்கொலை என்றும், நீட் தேர்வு என்பது கல்வியின் பெயரால் நிகழும் ஒரு கட்டாயக் குற்றம் என்றும் அவர் கடுமையாகச் சாடியுள்ளார்.
நீட் தேர்வு, மாணவர்களின் வெற்றியை மையமாகக் கொள்ளாமல், வியாபாரத்தை நோக்கமாகக் கொண்டு கட்டமைக்கப்பட்டுள்ளது என்றும், இந்தித் திணிப்புக்கு எதிரான போராட்டங்களில் பல உயிர்கள் தியாகமானதைப் போலவே, நீட் தேர்விலும் எண்ணற்ற உயிர்கள் பலியாகியிருக்கின்றன என்றும் வைரமுத்து தனது எக்ஸ் (முன்னர் ட்விட்டர்) தளப் பதிவில் குறிப்பிட்டுள்ளார். இந்தித் திணிப்புக்கு ஒரு நீதியும், நீட் திணிப்புக்கு வேறொரு நீதியும் இருப்பது ஏற்புடையதல்ல எனவும் அவர் கேள்வி எழுப்பியுள்ளார்.
நீட் தேர்வு, மாணவர்களின் வெற்றி தோல்வியைப் பற்றிய கவலைகளை விட, வாழ்வா சாவா என்ற பதற்றத்தையே ஏற்படுத்துகிறது. லட்சக்கணக்கான குடும்பங்களை இந்தத் தேர்வு மரணத்தின் விளிம்புக்கே அழைத்துச் சென்று, அடுத்தடுத்த துயரங்களுக்குத் தயார் செய்கிறது. எனவே, நீட் தேர்வை உருவாக்கிய கல்வித் திட்டத்தையே தான் எதிர்ப்பதாகவும், இதை மாநிலங்களின் விருப்பத்திற்கே விட்டுவிட வேண்டும் என்றும் அவர் வலியுறுத்தியுள்ளார்.
வெடித்த தென்னம்பாளையில் தடித்த இடி விழுந்ததைப் போல, நம் இளைஞர்கள் மீது இந்தக் கொடுமை நிகழாமல் தடுக்க, தேசம் முழுவதும் ஒன்றுதிரண்டு, நீதியில்லாத இந்த நீட் சட்டத்தை எரித்தெறிய வேண்டும் என்று கவிஞர் வைரமுத்து உணர்ச்சிப்பூர்வமாக அழைப்பு விடுத்துள்ளார்.
