தெலங்கானா மாநிலம், ஜகீராபாத் சத்வார் கிராமப் பகுதியில் இன்று ஒரு துயரமான சாலை விபத்து நிகழ்ந்துள்ளது. வேலை முடிந்து தங்கள் கிராமத்திற்கு ஆட்டோவில் திரும்பிக் கொண்டிருந்த விவசாய கூலித் தொழிலாளர்கள் மீது, எதிர்பாராத விதமாக வந்த டேங்கர் லாரி ஒன்று அதிவேகமாக மோதியதில் இந்த கோர சம்பவம் அரங்கேறியுள்ளது.
இந்த கொடூர விபத்தில், ஆட்டோ ஓட்டுநர் உட்பட மொத்தம் 6 பேர் சம்பவ இடத்திலேயே உடல் சிதறி பரிதாபமாக உயிரிழந்தனர். விபத்துக்குள்ளான ஆட்டோவில் மொத்தம் 12 பேர் பயணித்துள்ளனர். அவர்களில் உயிரிழந்த 6 பேரைத் தவிர, எஞ்சிய 6 பேர் பலத்த காயங்களுடன் மீட்கப்பட்டுள்ளனர்.
உடனடியாக சம்பவ இடத்திற்கு விரைந்த மீட்புப் படையினர், காயமடைந்தவர்களை மீட்டு சிகிச்சைக்காக ஜகீராபாத் அரசு மருத்துவமனைக்கு அனுப்பி வைத்தனர். மருத்துவமனை வட்டாரங்கள் தெரிவிக்கையில், அனுமதிக்கப்பட்டுள்ளவர்களில் சிலரின் உடல்நிலை மிகவும் கவலைக்கிடமாக இருப்பதாகவும், இதனால் உயிரிழப்புகள் மேலும் அதிகரிக்கக்கூடும் எனவும் அஞ்சப்படுகிறது.
விபத்து குறித்த தகவல் அறிந்ததும், உள்ளூர் காவல்துறையினர் சம்பவ இடத்திற்கு விரைந்து வந்து மீட்புப் பணிகளில் ஈடுபட்டனர். பொதுமக்களின் உதவியுடன், விபத்துக்குள்ளான வாகனங்கள் அப்புறப்படுத்தப்பட்டு, அப்பகுதியில் தடைபட்டிருந்த போக்குவரத்து சீரமைக்கப்பட்டது.
இந்த கோர விபத்து தொடர்பாக, காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர். கட்டுப்பாட்டை இழந்த டேங்கர் லாரி மற்றும் அதன் ஓட்டுநர் குறித்து தீவிர விசாரணை நடைபெற்று வருவதாகவும், விபத்துக்கான காரணம் விரைவில் கண்டறியப்படும் எனவும் காவல்துறை தரப்பில் தெரிவிக்கப்பட்டுள்ளது.
உயிரிழந்த அனைவரும், கர்நாடக மாநிலம் பீதர் மாவட்டத்தைச் சேர்ந்தவர்கள் என்றும், தினசரி கூலி வேலைக்காக தெலங்கானா எல்லை தாண்டி வந்து செல்லும் ஏழைத் தொழிலாளர்கள் என்றும் தெரியவந்துள்ளது. இவர்களின் திடீர் மறைவு, அந்தப் பகுதி மக்களிடையே பெரும் சோகத்தையும், அதிர்ச்சியையும் ஏற்படுத்தியுள்ளது. இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.
