சினிமா பாணியிலான பேச்சுகள் சமூக வலைதளங்களில் 'ரீல்ஸ்' செய்வதற்கு மட்டுமே பயன்படும் என்றும், அவை தமிழக மக்களின் பிரச்சனைகளுக்குத் தீர்வு காண உதவாது என்றும் அம்மா மக்கள் முன்னேற்றக் கழகத்தின் (அமமுக) பொதுச்செயலாளர் டிடிவி தினகரன் தெரிவித்துள்ளார். முதல்வர் விஜய் சட்டமன்றத்தை ஒரு படப்பிடிப்பு தளம் போல மாற்றி, சினிமா வசனங்களைப் பேசுவதாக அவர் குற்றம் சாட்டியுள்ளார்.
தேர்தல் வாக்குறுதியான பயிர்க்கடனை முழுமையாக நிறைவேற்றக் கோரிப் போராடும் விவசாயிகளை, எதிர்க்கட்சிகளின் தூண்டுதலால் போராடுவதாக முதல்வர் விஜய் கூறியிருப்பது விவசாயப் பெருமக்களை அவமதிக்கும் செயல் என தினகரன் கண்டனம் தெரிவித்துள்ளார். மேலும், ஆட்சிக்கு வருவதற்கு முன் போதைப்பொருள் நடமாட்டத்தை விமர்சித்த விஜய், தனது 40 நாள் ஆட்சியில் அதைத் தடுக்க என்ன நடவடிக்கை எடுத்தார் என்றும் அவர் கேள்வி எழுப்பியுள்ளார். முதலமைச்சராகப் பொறுப்பேற்றவுடன் கையெழுத்திட்ட போதைப்பொருள் தடுப்புப் படை தற்போது செயல்படுகிறதா என்றும் அவர் சந்தேகத்தை எழுப்பியுள்ளார்.
மாநிலத்தில் அன்றாடம் நடக்கும் கொலை, கொள்ளை, பெண்களுக்கு எதிரான பாலியல் வன்கொடுமைகளைக் கட்டுப்படுத்தாமல், அனைத்துப் பிரச்சனைகளுக்கும் 'கால அவகாசம்' கேட்பது பொறுப்பைத் தட்டிக்கழிக்கும் செயல் என்று தினகரன் விமர்சித்துள்ளார். மாதம் 200 யூனிட் இலவச மின்சாரம் என்று அறிவித்துவிட்டு, தற்போது இரண்டு மாதங்களுக்குச் சேர்த்து 200 யூனிட் என்று மாற்றி அறிவித்து, அதை ஒரு சாதனையாக முதல்வர் விஜய் பேசுவது ஏமாற்று வேலை என்றும் அவர் சாடியுள்ளார்.
குதிரை பேரம் நடத்தி, சட்டமன்ற உறுப்பினர்களை ராஜினாமா செய்ய வைத்ததுதான் விஜய் பேசும் ஜனநாயகமா என்றும், 'ஊழல் செய்யத் தெரியாது' என்று கூறும் விஜய்யின் தவெக நிர்வாகிகளுக்கு 40 நாட்களில் தெரிந்த லஞ்ச முறைகேடுகளை விரைவில் நினைவூட்டப் போவதாகவும் டிடிவி தினகரன் தனது அறிக்கையில் ஆக்ரோஷமாக எச்சரித்துள்ளார்.
