மும்பையில் இருந்து வெளியாகும் டாடா கன்சல்டன்சி சர்வீசஸ் (TCS) நிறுவனத்தின் தலைமை செயல் அதிகாரி (CEO) கே.கிருத்திவாசன், 2026 நிதியாண்டில் சுமார் 28.1 கோடி ரூபாயை சம்பளமாக பெற்றுள்ளார். இது கடந்த நிதியாண்டை விட 6.3 சதவீதம் அதிகம் என்பது குறிப்பிடத்தக்கது. இந்த அறிவிப்பு, நிறுவனத்தின் வருடாந்திர அறிக்கையின் மூலம் வெளியாகியுள்ளது.
TCS போன்ற முன்னணி நிறுவனம், தனது ஊழியர்களின் எண்ணிக்கையில் 23,000 க்கும் அதிகமானோரை குறைத்துள்ள நிலையில், சிஇஓ-வின் சம்பளம் உயர்த்தப்பட்டுள்ளது அனைவரின் கவனத்தையும் ஈர்த்துள்ளது. 2025 நிதியாண்டின் இறுதியில் 6,07,979 ஆக இருந்த ஊழியர்களின் எண்ணிக்கை, 2026 நிதியாண்டின் இறுதியில் 5,84,519 ஆக குறைந்துள்ளது.
2026 நிதியாண்டில் கிருத்திவாசனின் மொத்த ஊதிய தொகுப்பில், அடிப்படை சம்பளமாக 1.67 கோடி ரூபாயும், இதர சலுகைகள் மற்றும் படிகளாக 1.43 கோடி ரூபாயும் அடங்கும். இதில் முக்கியமாக, கமிஷன் தொகையாக மட்டும் அவர் 25 கோடி ரூபாயை பெற்றுள்ளார். இதன் மூலம் அவரது மொத்த வருவாய் 28.1 கோடி ரூபாயாக உயர்ந்துள்ளது.
மேலும், 2026 மார்ச் 31 ஆம் தேதி நிலவரப்படி, கிருத்திவாசன் TCS நிறுவனத்தின் 11,232 பங்குகளை வைத்துள்ளார். நிறுவனத்தின் வருடாந்திர அறிக்கையின்படி, அவரது இந்த சம்பளம், TCS ஊழியர்களின் சராசரி சம்பளத்தை விட 332.8 மடங்கு அதிகம் என்பது தெரியவந்துள்ளது.
