தமிழகத்தில் உள்ள டாஸ்மாக் மதுபானக் கடைகளில் இனி ரொக்கப் பணப் பரிவர்த்தனைகளுக்கு புதிய கட்டுப்பாடு விதிக்கப்பட்டுள்ளது. வாடிக்கையாளர்கள் ரூ.500 வரை மட்டுமே ரொக்கமாகச் செலுத்த முடியும் என்றும், அதற்கு மேற்பட்ட தொகையை டிஜிட்டல் முறையிலேயே செலுத்த வேண்டும் என்றும் நிர்வாகம் அதிரடியாக முடிவு செய்துள்ளது.
இந்த முக்கிய அறிவிப்பின் பின்னணியில், மதுபானங்கள் கூடுதல் விலைக்கு விற்பனை செய்யப்படுவதைத் தடுப்பதும், சில்லறை தட்டுப்பாடு போன்ற பிரச்னைகளுக்குத் தீர்வு காண்பதும் முக்கிய நோக்கங்களாகக் கூறப்படுகின்றன. இதற்கான விரிவான வழிகாட்டுதல்கள் விரைவில் அனைத்து டாஸ்மாக் கடைகளுக்கும் பிறப்பிக்கப்பட உள்ளன.
தமிழகத்தில் உள்ள டாஸ்மாக் கடைகளில் தினசரி சராசரியாக ரூ.150 கோடிக்கு மேல் விற்பனை நடைபெறுகிறது. குறிப்பாக, வார இறுதி நாட்கள் மற்றும் பண்டிகை காலங்களில் இந்த விற்பனை மேலும் அதிகரிக்கிறது. இந்த விற்பனையில் 80 சதவீதத்திற்கும் மேல் ரொக்கப் பணமாகவே வசூலிக்கப்படுகிறது. இந்த ரொக்கப் பணத்தை பணியாளர்கள் கடைகளிலேயே இருப்பு வைத்து, அடுத்த நாள் வங்கியில் செலுத்தி வருகின்றனர். இருப்பினும், இவ்வாறு பணத்தை எடுத்துச் செல்லும் போது கொள்ளை சம்பவங்கள் அடிக்கடி நிகழ்வதாகவும் தகவல்கள் தெரிவிக்கின்றன.
தற்போது, மதுபிரியர்கள் தங்களுக்குத் தேவையான மது வகைகளை டாஸ்மாக் இணையதளத்தில் தேர்வு செய்து, அதன் வழியாக பணத்தைச் செலுத்தி, ஒரு குறியீட்டைப் பெற்றுக்கொண்டு கடைகளில் மதுபானங்களை வாங்கலாம் என்ற வசதியும் உள்ளது. ஆனால், இந்த முறையில் மதுபானங்கள் வாங்குவோருக்கு, பாட்டில்களை வழங்குவதில் தாமதம் ஏற்படுவதாகப் புகார்கள் எழுந்துள்ளன. இதற்கு, ரொக்கப் பணத்தை வசூலிப்பதில் ஊழியர்கள் அதிக ஆர்வம் காட்டுவதே முக்கியக் காரணம் என்று டாஸ்மாக் நிர்வாகம் கண்டறிந்துள்ளது.
பெரும்பாலான இடங்களில் டிஜிட்டல் பரிவர்த்தனைகள் (UPI, கார்டுகள் போன்றவை) ஊக்குவிக்கப்பட்டு வரும் நிலையிலும், ஊழியர்கள் ரொக்கமாகப் பணம் பெறுவதில் காட்டும் அதீத ஆர்வம் காரணமாக, வாடிக்கையாளர்களுக்குப் பாட்டில்களை வழங்குவதில் தேவையற்ற காலதாமதமும், அதிருப்தியும் ஏற்படுவதாகத் தெரியவந்துள்ளது. இதைச் சரிசெய்யும் விதமாக, ரொக்கப் பணப் புழக்கத்தைக் குறைத்து, டிஜிட்டல் பரிவர்த்தனைகளை அதிகரிக்கும் நோக்கில் இந்த புதிய நடவடிக்கை எடுக்கப்பட்டுள்ளது.
இதுகுறித்து டாஸ்மாக் அதிகாரி ஒருவர் கூறுகையில், 'கடைகளில் மதுபானங்களை கூடுதல் விலைக்கு விற்பனை செய்வதைத் தடுக்கவும், சில்லறை தட்டுப்பாடு போன்ற பிரச்னைகளுக்குத் தீர்வு காணவும், டிஜிட்டல் பணப் பரிவர்த்தனையை அதிகரிக்க நாங்கள் திட்டமிட்டுள்ளோம். இதற்காக, இனிமேல் ரூ.500 வரை மட்டுமே ரொக்கமாகப் பெற்றுக்கொள்ளப்படும். அதற்கு மேற்பட்ட தொகையை டிஜிட்டல் முறையில் மட்டுமே வசூலிக்க முடிவு செய்யப்பட்டுள்ளது. இதுதொடர்பாக, விரைவில் அனைத்து டாஸ்மாக் கடைகளுக்கும் உரிய அறிவுரைகள் வழங்கப்படும்' என்று தெரிவித்தார்.
