இந்தியாவின் ஒட்டுமொத்த வளர்ச்சிக்கு தமிழ்நாடு மகத்தான பங்களிப்பை வழங்கி வருகிறது என பிரதமர் நரேந்திர மோடி புகழாரம் சூட்டியுள்ளார்.
தமிழ்நாடு தினத்தை முன்னிட்டு, மாநில மக்களுக்கு தனது மனமார்ந்த வாழ்த்துகளை பிரதமர் மோடி தனது எக்ஸ் (முன்னர் ட்விட்டர்) தளத்தில் தெரிவித்துள்ளார். 'தமிழ்நாட்டு மக்கள் அனைவருக்கும் இந்த சிறப்பான தமிழ்நாடு தினத்தில் மனம் நிறைந்த நல்வாழ்த்துகள்!' என்று அவர் தனது வாழ்த்துச் செய்தியைத் தொடங்கியுள்ளார்.
தொழில்முனைவு மற்றும் கடின உழைப்பு ஆகியவற்றில் சிறந்து விளங்கும் தமிழ்நாட்டு மக்கள், இந்தியாவின் வளர்ச்சிக்கு மிக முக்கியப் பங்காற்றியுள்ளனர் என்பதை பிரதமர் மோடி தனது பதிவில் குறிப்பிட்டுள்ளார். உற்பத்தித் துறை, வாகனங்கள், ஜவுளித்துறை, மின்னணுவியல், விண்வெளி தொழில்நுட்பம், மருத்துவம் மற்றும் வேகமாக வளர்ந்து வரும் பல்வேறு தொழில்துறைகள் வரை, தமிழ்நாடு தனித்துவமான கண்டுபிடிப்புகள், சிறந்த திறன்கள் மற்றும் தொழில்துறை சிறப்புகளுடன் திகழ்வதாகவும் அவர் பாராட்டியுள்ளார்.
மேலும், தமிழ்நாட்டு மக்கள் தங்கள் வளமான பண்பாடு, தனித்துவம் மற்றும் பாரம்பரியம் ஆகியவற்றின் மீது மிகுந்த பெருமிதம் கொள்வதாகவும் பிரதமர் மோடி குறிப்பிட்டுள்ளார். தமிழ் கலாச்சாரம், இந்தியாவின் ஒட்டுமொத்த நாகரிகப் பயணத்தை பல வழிகளில் செழுமைப்படுத்தியுள்ளது என்றும் அவர் தனது வாழ்த்துச் செய்தியில் தெரிவித்துள்ளார்.
இந்த இனிய தமிழ்நாடு தின நன்னாளில், தமிழ்நாட்டில் உள்ள ஒவ்வொருவருக்கும் இன்றும், எதிர்காலத்திலும் மகிழ்ச்சி, வெற்றி மற்றும் புதிய வாய்ப்புகள் ஏராளமாக வந்து சேரட்டும் என்றும் பிரதமர் மோடி தனது வாழ்த்துகளைத் தெரிவித்துள்ளார். தமிழகத்தின் சிறப்புகளையும், மக்களின் உழைப்பையும் பிரதமர் மோடி இவ்வாறு பாராட்டியுள்ளது குறிப்பிடத்தக்கது.
