தமிழகத்தில் இந்த ஆண்டு எல் நினோ தாக்கத்தால் கனமழை பெய்யும் எனவும், கடுமையான வெப்ப அலை வீசும் எனவும் நிபுணர் குழு எச்சரிக்கை விடுத்துள்ளது. இது தொடர்பாக தமிழக அரசுக்கு நிபுணர் குழு பரிந்துரைகளையும் வழங்கியுள்ளது.
2026 ஆம் ஆண்டு வடகிழக்கு பருவமழையின் போது, சில பகுதிகளில் அதி கனமழை பெய்யக்கூடும் என்றும், இதனால் நகர்ப்புறங்கள், ஆற்றங்கரையோர பகுதிகள் மற்றும் கடலோர பகுதிகளில் வெள்ளப்பெருக்கு ஏற்பட வாய்ப்புள்ளது என்றும் நிபுணர் குழு தெரிவித்துள்ளது. மேலும், சில மாவட்டங்களில் மழைப்பற்றாக்குறை ஏற்பட்டு, குடிநீர் மற்றும் பாசனத்திற்கான தண்ணீர் தட்டுப்பாடு ஏற்படவும் சாத்தியக்கூறுகள் உள்ளன.
இதனைத் தொடர்ந்து, 2027 ஆம் ஆண்டு கோடைக்காலத்தில் கடுமையான வெப்பம் மற்றும் வெப்ப அலைகள் தாக்கக்கூடும் என்றும், எனவே தமிழக அரசு இதற்காக முன்கூட்டியே தயாராக இருக்க வேண்டும் என்றும் நிபுணர் குழு வலியுறுத்தியுள்ளது.
வடகிழக்கு பருவமழை தொடங்குவதற்கு முன்பாக, மாநிலம் முழுவதும் உள்ள ஆறுகள், கால்வாய்கள், நீர்த்தேக்கங்கள், அணைகள் மற்றும் வடிகால்களை முழுமையாக ஆய்வு செய்து, அவற்றில் படிந்துள்ள வண்டல் மண் மற்றும் குப்பைகளை அகற்ற வேண்டும் என நிபுணர் குழு பரிந்துரைத்துள்ளது. இது வெள்ள அபாயத்தைக் குறைக்கவும், நீர்நிலைகளின் கொள்ளளவை அதிகரிக்கவும் உதவும்.
மேலும், வெள்ளம் உள்ளிட்ட பேரிடர் காலங்களில், மாவட்ட மற்றும் வட்டார அளவிலான ஆபத்துகளுக்கு ஏற்ப, பொதுமக்களுக்கு எச்சரிக்கைகளை உடனடியாகவும், விரைவாகவும் தமிழில் வழங்க வேண்டும் என்றும் நிபுணர் குழு வலியுறுத்தியுள்ளது. இதன் மூலம், உரிய நேரத்தில் மக்களை பாதுகாப்பான இடங்களுக்கு அப்புறப்படுத்த முடியும்.
2027 ஆம் ஆண்டு கோடைக்காலத்தை திறம்பட எதிர்கொள்ள, வெப்பம் மற்றும் வறட்சியைத் தாங்கி வளரக்கூடிய குறுகிய கால பயிர்களை ஊக்குவிக்க வேண்டும் என்றும், பள்ளிகள் மற்றும் அரசு கட்டிடங்களில் வெப்பத்தைக் குறைப்பதற்கான நடவடிக்கைகளை மேற்கொள்ள வேண்டும் என்றும் நிபுணர் குழு தனது பரிந்துரைகளில் குறிப்பிட்டுள்ளது. இந்த நடவடிக்கைகள் மூலம், பொதுமக்கள் மற்றும் மாணவர்களின் நலனைப் பாதுகாக்க முடியும்.
