தமிழகம் ஆவலோடு எதிர்பார்த்திருந்த தருணம் இது! நடிகர் விஜய்யின் தலைமையிலான தவெக ஆட்சி பொறுப்பேற்ற பிறகு, இன்று மாலை 5.30 மணிக்கு மாநிலத்தின் நிதிநிலை குறித்த வெள்ளை அறிக்கை வெளியிடப்பட உள்ளது. முதலமைச்சராக பதவியேற்றதும், முந்தைய திமுக ஆட்சியின் நிதிநிலை குறித்த ஆய்வுக்குப் பிறகு வெள்ளை அறிக்கை வெளியிடுவதாக முதல்வர் விஜய் தெரிவித்திருந்தார். ஆனால், அறிவிப்பு வெளியாகி ஒரு மாதம் ஆகியும் அறிக்கை வெளியாகாதது சில கேள்விகளை எழுப்பியது.

முதல்வர் விஜய் தலைமையில் நிதிநிலை குறித்து பல்வேறு ஆலோசனைக் கூட்டங்கள் நடைபெற்றன. இந்த ஆலோசனைகளின் அடிப்படையில், நிதியமைச்சர் மரிய வில்சன் இன்று மாலை 5.30 மணிக்கு நிதிநிலை குறித்த வெள்ளை அறிக்கையை வெளியிடுகிறார். இந்த அறிக்கையில், துறைகள் சார்ந்த திட்டங்கள், நிறைவேற்றப்பட்ட திட்டங்களின் செலவினங்கள், நிலுவையில் உள்ள திட்டங்கள், மாநிலத்தின் மொத்த கடன், மத்திய அரசிடம் இருந்து பெறப்பட்ட நிதி உள்ளிட்ட அனைத்து விவரங்களும் இடம்பெறும்.

முன்னதாக, '10 லட்சம் கோடி கடன் உள்ளது. கஜானாவில் என்ன இருக்கிறது, என்ன இல்லை? என்ன செய்ய முடியும் என்பதை ஆராய வேண்டும். சிறிது காலம் அவகாசம் கொடுங்கள். விரைவில் தமிழ்நாட்டின் நிதிநிலை குறித்து வெள்ளை அறிக்கை வெளியிடுவோம்' என முதல்வர் விஜய் கூறியிருந்தார். தற்போது, இந்த வெள்ளை அறிக்கை வெளியீடு, மாநிலத்தின் நிதிநிலை குறித்த வெளிப்படைத்தன்மையை அதிகரிக்கும் என எதிர்பார்க்கப்படுகிறது.

நாளை சட்டசபை கூடவுள்ள நிலையில், இன்று மாலை நிதிநிலை குறித்த வெள்ளை அறிக்கை வெளியாவது முக்கியத்துவம் வாய்ந்ததாகக் கருதப்படுகிறது. இது, வரவிருக்கும் சட்டமன்ற கூட்டத்தொடரில் விவாதங்களுக்கு வழிவகுக்கும் என்றும் எதிர்பார்க்கப்படுகிறது.