சென்னை சூப்பர் கிங்ஸ் அணியின் முன்னாள் தலைமைப் பயிற்சியாளரான ஸ்டீபன் பிளெமிங், இங்கிலாந்து டெஸ்ட் கிரிக்கெட் அணியின் புதிய தலைமைப் பயிற்சியாளராக நியமிக்கப்பட உள்ளதாகத் தகவல்கள் வெளியாகியுள்ளன. இந்த நியமனம் மூலம், சிஎஸ்கே-வில் இருந்து நேரடியாக லண்டனுக்குச் செல்ல உள்ளார் ஸ்டீபன் பிளெமிங்.
2026 ஐபிஎல் தொடருக்குப் பிறகு சென்னை சூப்பர் கிங்ஸ் அணியில் இருந்து ஸ்டீபன் பிளெமிங் விலகினார். தற்போது அவர் இங்கிலாந்து டெஸ்ட் கிரிக்கெட் அணியின் பயிற்சியாளராகப் பொறுப்பேற்க உள்ளார் என இங்கிலாந்து ஊடகங்கள் செய்தி வெளியிட்டுள்ளன. சமீபத்தில் நடைபெற்ற ஆஷஸ் டெஸ்ட் தொடர் மற்றும் நியூசிலாந்துக்கு எதிரான டெஸ்ட் தொடர்களில் இங்கிலாந்து அணி தோல்வியடைந்ததைத் தொடர்ந்து, பிரெண்டன் மெக்கல்லம் டெஸ்ட் பயிற்சியாளர் பதவியிலிருந்து நீக்கப்பட்டார்.
பிரெண்டன் மெக்கல்லமுக்குப் பதிலாகவே ஸ்டீபன் பிளெமிங் தற்போது இங்கிலாந்து டெஸ்ட் அணியின் பயிற்சியாளராக நியமிக்கப்பட உள்ளார். இருப்பினும், மெக்கல்லம் இங்கிலாந்து ஒருநாள் மற்றும் டி20 அணிகளின் பயிற்சியாளராகத் தொடர்ந்து செயல்படுவார். முன்னதாக, இங்கிலாந்து டெஸ்ட் அணியின் புதிய பயிற்சியாளர் பதவிக்கான போட்டியில் ஜோனதன் டிராட், ரிச்சர்ட் டாசன் மற்றும் ஆஸ்திரேலியாவின் டாம் மூடி ஆகியோர் இருந்தனர். ராயல் சேலஞ்சர்ஸ் பெங்களூரு அணியின் பயிற்சியாளர் ஆன்டி பிளவர் மற்றும் ஆஸ்திரேலியாவின் ஜஸ்டின் லாங்கர் ஆகியோர் இந்தப் பொறுப்பில் ஆர்வம் காட்டாததால், ஸ்டீபன் பிளெமிங்கிற்கு இந்த வாய்ப்பு கிடைத்துள்ளது.
நியூசிலாந்து அணியின் முன்னாள் கேப்டனான ஸ்டீபன் பிளெமிங், சென்னை சூப்பர் கிங்ஸ் அணியை ஐபிஎல் வரலாற்றிலேயே மிகவும் வெற்றிகரமான அணியாக மாற்றியவர். மேலும், அமெரிக்காவின் டெக்சாஸ் சூப்பர் கிங்ஸ் மற்றும் தென்னாப்பிரிக்காவின் ஜோகன்னஸ்பர்க் சூப்பர் கிங்ஸ் ஆகிய அணிகளுக்கும் அவர் தலைமைப் பயிற்சியாளராகச் செயல்பட்டுள்ளார்.
இங்கிலாந்து அணி அடுத்த 3 வாரங்களில் பாகிஸ்தானுக்கு எதிராக ஒரு டெஸ்ட் தொடரில் விளையாட உள்ளது. ஸ்டீபன் பிளெமிங் அதிகாரப்பூர்வமாகப் பொறுப்பேற்கும் வரை, உதவிப் பயிற்சியாளர் மார்கஸ் ட்ரெஸ்கோதிக் தற்காலிகப் பயிற்சியாளராகச் செயல்படுவார் என்று எதிர்பார்க்கப்படுகிறது. அதன் பிறகு, வரும் டிசம்பர் மாதம் நடைபெறவுள்ள தென்னாப்பிரிக்காவுக்கு எதிரான தொடரில் பிளெமிங் முழுமையாகப் பொறுப்பேற்கக் கூடும்.
இங்கிலாந்து அணி 2015-ம் ஆண்டுக்குப் பிறகு ஆஷஸ் தொடரை வெல்லவில்லை. அந்த 10 ஆண்டுகால தாகத்தைத் தீர்ப்பதே ஸ்டீபன் பிளெமிங்கின் முதல் சவாலாக அமையும். அதே சமயம், டி20 போட்டிகள் ஆடும் அணிகளுக்கு மட்டுமே பயிற்சியாளராக இருந்த ஸ்டீபன் பிளெமிங், எப்படி ஒரு முன்னணி டெஸ்ட் அணியின் பயிற்சியாளராகச் செயல்படப் போகிறார் என்ற எதிர்பார்ப்பும் ரசிகர்கள் மத்தியில் எழுந்துள்ளது.
இந்த நியமனம் கிரிக்கெட் உலகில் பெரும் எதிர்பார்ப்பை ஏற்படுத்தியுள்ளது. ஸ்டீபன் பிளெமிங்கின் பயிற்சியின் கீழ் இங்கிலாந்து டெஸ்ட் அணி எவ்வாறு செயல்படும் என்பதைப் பொறுத்திருந்துதான் பார்க்க வேண்டும்.
புதிய பயிற்சியாளரின் வருகை, இங்கிலாந்து டெஸ்ட் கிரிக்கெட்டில் ஒரு புதிய அத்தியாயத்தைத் தொடங்கும் என எதிர்பார்க்கப்படுகிறது. அவரது அனுபவமும், வியூகங்களும் இங்கிலாந்து அணிக்கு வெற்றியைத் தேடித் தரும் என நம்பப்படுகிறது.
