செப்டம்பர் 1ஆம் தேதி முதல், சாமானிய மக்களின் அன்றாட வாழ்க்கை மற்றும் நிதி நிலையை நேரடியாகப் பாதிக்கக்கூடிய 6 முக்கிய மாற்றங்கள் அமலுக்கு வரவுள்ளன. சமையலறைச் செலவுகள் முதல் வங்கிச் சேவைகள், வெளிநாட்டுப் பயணங்கள் வரை பல்வேறு துறைகளில் இந்த மாற்றங்கள் எதிரொலிக்கும்.
எண்ணெய் சந்தைப்படுத்தும் நிறுவனங்கள், ஒவ்வொரு மாதமும் முதல் தேதியன்று எரிவாயு சிலிண்டர் விலையை மாற்றியமைக்கின்றன. அந்த வகையில், செப்டம்பர் 1ஆம் தேதி முதல் சமையல் எரிவாயு சிலிண்டர் விலையில் மாற்றம் ஏற்பட வாய்ப்புள்ளது. இது விலை உயர்வாகவோ அல்லது விலை குறைப்பாகவோ இருக்கலாம். கடந்த ஆகஸ்ட் 1ஆம் தேதி, வணிகப் பயன்பாட்டிற்கான 19 கிலோ சிலிண்டரின் விலை ரூ. 202 குறைக்கப்பட்ட நிலையில், வீட்டு உபயோக 14.2 கிலோ சிலிண்டர் விலையில் எந்த மாற்றமும் செய்யப்படவில்லை. எனவே, இந்த முறை வீட்டு சிலிண்டர் விலையில் மாற்றம் வருமா என்பது எதிர்பார்ப்பை ஏற்படுத்தியுள்ளது.
வெளிநாட்டுப் பயணிகளின் விமான நிலைய அனுபவத்தை எளிதாக்கும் வகையில் ஒரு முக்கிய விதிமுறை செப்டம்பர் 1 முதல் மாறுகிறது. இனி போர்டிங் பாஸ்களில் முத்திரையிட வேண்டிய அவசியம் இருக்காது. இதனால், சர்வதேச பயணிகள் விமான நிலையக் குடியேற்றப் பிரிவு (immigration) கவுண்டர்களில் நீண்ட வரிசையில் காத்திருக்க வேண்டிய தேவை இருக்காது. பயணிகள் தங்கள் மொபைல் போனில் உள்ள 'இ-போர்டிங் பாஸ்' அல்லது அதன் அச்சிடப்பட்ட நகலைக் காண்பிப்பதன் மூலமே குடியேற்றச் சோதனையைக் கடந்து செல்ல முடியும். இந்த மாற்றம் குடியேற்றச் செயல்முறையை விரைவாக்கும்.
விமான எரிபொருள் (ATF) விலையை எண்ணெய் சந்தைப்படுத்தும் நிறுவனங்கள் அடிக்கடி மாற்றியமைப்பதால், விமானப் பயணக் கட்டணங்களிலும் தாக்கம் ஏற்படுகிறது. செப்டம்பர் 1ஆம் தேதியன்று புதிய விமான எரிபொருள் விலைகள் அறிவிக்கப்படலாம். இது விமான நிறுவனங்கள் பயணக் கட்டணத்தை உயர்த்த வழிவகுக்கும். மேலும், CNG மற்றும் PNG விலைகளிலும் மாற்றம் ஏற்படக்கூடும்.
டாடா மோட்டார்ஸ் நிறுவனம், செப்டம்பர் 1ஆம் தேதி முதல் தனது அனைத்து கார்கள் மற்றும் SUV-களின் விலையை ரூ. 25,000 வரை உயர்த்துகிறது. இந்த விலை உயர்வு, எரிபொருள் மூலம் இயங்கும் வாகனங்கள் (ICE) மற்றும் மின்சார வாகனங்கள் (EV) ஆகிய இரண்டிற்கும் பொருந்தும். டாடா நிறுவனத்தைத் தொடர்ந்து, ஹூண்டாய் மோட்டார் இந்தியா நிறுவனமும் தனது கார்களின் விலையை இதே தேதியிலிருந்து உயர்த்தப்போவதாக அறிவித்துள்ளது.
வங்கி நிலையான வைப்புத்தொகை (FD) வட்டி விகிதங்களிலும் செப்டம்பர் 1ஆம் தேதி முதல் மாற்றம் ஏற்படலாம். வட்டி விகிதங்கள் குறைந்தால், வாடிக்கையாளர்களுக்குக் கிடைக்கும் வருமானம் குறையும். மாறாக, வட்டி விகிதங்கள் உயர்ந்தால் வாடிக்கையாளர்கள் பயனடைவார்கள். எனவே, FD திட்டங்களில் முதலீடு செய்வதற்கு முன், வட்டி விகித மாற்றங்களை ஆராய்ந்து முடிவெடுப்பது நல்லது.
ஏடிஎம் பரிவர்த்தனை கட்டணங்களிலும் செப்டம்பர் 1ஆம் தேதி முதல் மாற்றம் வரலாம். வங்கிகள் அடிக்கடி செய்யப்படும் ஏடிஎம் பரிவர்த்தனைகளுக்கு அதிக கட்டணம் வசூலிக்க வாய்ப்புள்ளது. எனவே, ஏடிஎம் பரிவர்த்தனைகளை மேற்கொள்வதற்கு முன், வங்கிகள் தங்களுடைய கட்டண வரம்புகளை மாற்றியமைக்கின்றனவா என்பதை அறிந்து செயல்படுவது அவசியம்.
