தமிழ்நாடு சட்டப்பேரவையில் 110 விதியின் கீழ் முதலமைச்சர் விஜய் அறிவிக்கும் திட்டங்கள் மக்களாட்சிக்கும், வாக்களித்த மக்களுக்கும் எதிரானது என நாம் தமிழர் கட்சி ஒருங்கிணைப்பாளர் சீமான் குற்றம் சாட்டியுள்ளார். இதுகுறித்து அவர் வெளியிட்டுள்ள அறிக்கையில், "நடைபெற்று வரும் தமிழ்நாடு சட்டப்பேரவை கூட்டத்தொடரில், 2026-27 ஆம் ஆண்டிற்கான நிதிநிலை அறிக்கை மீதான விவாதங்கள் நடைபெற்று வருகின்றன. ஆனால், 110 விதியின் கீழ் சிறப்பு அறிவிப்புகள் என்ற பெயரில், நிதிநிலை அறிக்கையில் இல்லாத புதிய திட்டங்களை ஒவ்வொரு நாளும் தமிழ்நாடு முதல்வர் அறிவித்து வருவது ஏன்?" என அவர் கேள்வி எழுப்பியுள்ளார்.
"அனைத்துத் திட்டங்களும் 110 விதியின் கீழ் அறிவிக்கப்படும் என்றால், தனியாக நிதிநிலை அறிக்கை எதற்கு? அதன் மீதான விவாதங்கள்தான் எதற்கு? சட்டப்பேரவையில் முதலமைச்சர் வெளியிடும் முக்கியத் திட்டங்கள் குறித்து அவையில் விவாதங்கள் நடைபெற வேண்டாமா? மக்களுக்கான இன்றியமையாத திட்டங்கள் ஏன் நிதிநிலை அறிக்கையில் இடம்பெறவில்லை?" என்றும் சீமான் தனது அறிக்கையில் குறிப்பிட்டுள்ளார்.
முன்னதாக, பொது முக்கியத்துவம் வாய்ந்த அரசு முடிவுகள் மற்றும் புதிய திட்டங்களைப் பேரவைத்தலைவர் அனுமதியுடன் சட்டப்பேரவையில் அறிவிக்கவும், அறிவிக்கும் நேரத்தில் அதன் மீது விவாதம் நடைபெறாமல் இருக்கவும் கடந்த திமுக, அதிமுக அரசுகள் விதி 110-ஐ பயன்படுத்தியதாக சீமான் சுட்டிக்காட்டினார். ஆனால், 'மாற்றம்' எனச் சொல்லி ஆட்சிக்கு வந்த தவெக அரசு, விளம்பர வெற்று அறிவிப்புகளுக்கு இதைப் பயன்படுத்துவது, நம்பி வாக்களித்த மக்களுக்குச் செய்யும் துரோகம் என்றும், இதுதான் மாற்றமா என்றும் அவர் விமர்சித்துள்ளார்.
சட்டங்களை உருவாக்கவும், விவாதிக்கவும், நிறைவேற்றவும் அமைக்கப்பட்ட சட்டப்பேரவையில், இவ்விதியை பயன்படுத்தி நிதிநிலை அறிக்கையில் இடம்பெறாத திட்டங்களை ஒவ்வொரு நாளும் வெளியிடுவதும், அதன் மீது விவாதம் நடைபெறாமல் கடந்து போவதும், சட்டப்பேரவை உருவாக்கப்பட்டதற்கான நோக்கத்தையே சிதைப்பதாக சீமான் தெரிவித்துள்ளார். மக்களால் தேர்ந்தெடுக்கப்பட்ட உறுப்பினர்கள் நிறைந்த அவையில், மக்களுக்காக அறிவிக்கப்படும் திட்டங்கள் குறித்து சட்டமன்ற உறுப்பினர்களின் கருத்துக்களைத் தெரிவிக்கும் வாய்ப்பைப் பறிப்பது கொடுங்கோன்மை என்றும் அவர் குறிப்பிட்டுள்ளார்.
முதலமைச்சரின் பொறுப்பிலிருந்த துறைகளையே மற்ற அமைச்சர்களுக்கு ஒதுக்கிவிட்ட நிலையில், மற்ற அமைச்சகம் சார்ந்த அறிவிப்புகளை வெளியிடுவதற்கு மட்டும் முதலமைச்சர் ஏன் பொறுப்பேற்க வேண்டும் என்றும் சீமான் கேள்வி எழுப்பியுள்ளார். அமைச்சர்கள் வெளியிட வேண்டிய அறிவிப்புகளை முதலமைச்சர் வெளியிடுவது, அமைச்சர்களின் தனித்துவத்தைக் குறைக்கும் செயல் என்றும், இதன் மூலம் தவெக அரசு தமிழ்நாட்டு மக்களுக்குச் சொல்ல வரும் செய்தி என்ன? அனைத்து முக்கியத் திட்டங்களும் முதலமைச்சரின் மூளையில் உதித்தது என்பதையா? என்றும் அவர் சாடியுள்ளார்.
கடந்த ஆகஸ்ட் 17ஆம் தேதியிலிருந்து இன்று வரை தவெக அரசு விதி 110-ன் கீழ் வெளியிடப்பட்ட திட்டங்களுக்கான மதிப்பு மட்டும் ஏறத்தாழ ரூ.73,900 கோடி என சீமான் குறிப்பிட்டுள்ளார். மேலும், எரிகாற்று உருளை, இலவச பேருந்து, பால் கொள்முதல் உள்ளிட்டவற்றுக்கு ஆண்டுதோறும் தொடர் செலவாக 10,720 கோடி ரூபாய் வரை தேவைப்படுகிறது என்றும் அவர் தெரிவித்துள்ளார்.
இத்தனை ஆயிரம் கோடி ரூபாய் செலவிடப்படும் திட்டங்களின் வரவு செலவுகள் நிதிநிலை அறிக்கையில் இடம்பெறாதது ஏன் என்றும், நிதிநிலை அறிக்கையின்படி இந்த ஆண்டு மட்டும் ஒரு லட்சத்தி எழுபத்தாறாயிரம் கோடி கடன் வாங்குவதாக அறிவித்திருக்கும் நிலையில், புதிதாக 110 விதியின் கீழ் அறிவித்திருக்கும் திட்டங்களுக்கான ரூ.73,900 கோடிக்கான நிதியை எப்படி பெறுவீர்கள், யாரிடம் கடன் வாங்குவீர்கள் என்றும் சீமான் கேள்வி எழுப்பியுள்ளார். இதுதான் கடன் சுமையைக் குறைக்கும் முறையா? இதுதான் தமிழ்நாட்டை முன்னேற்றுவதற்கான மாற்றமா? என்றும் அவர் வினவியுள்ளார்.
மக்களாட்சிக்கு எதிரான, நிதி ஆதாரமில்லாத வெற்று விளம்பர திட்டங்களை 110 விதியின் கீழ் அறிவிப்பதை உடனடியாக நிறுத்திக்கொள்ள வேண்டுமென நாம் தமிழர் கட்சி சார்பாக வலியுறுத்துகிறேன் என்றும் சீமான் தனது அறிக்கையில் குறிப்பிட்டுள்ளார்.
