தமிழ்நாட்டின் உயர்கல்வியை வணிகமயமாக்கும் வகையில், தமிழ்நாடு அரசு அவசர அவசரமாக நிறைவேற்றியுள்ள தமிழ்நாடு தனியார் பல்கலைக்கழகத் திருத்தச்சட்டம் – 2026ஐ உடனடியாகத் திரும்பப்பெற வேண்டும் என்று நாம் தமிழர் கட்சி ஒருங்கிணைப்பாளர் சீமான் வலியுறுத்தியுள்ளார்.
இது தொடர்பாக சீமான் வெளியிட்டுள்ள அறிக்கையில், 'தமிழ்நாட்டின் உயர்கல்வியை வணிகமயமாக்கும் நோக்கத்துடன், தமிழ்நாடு சட்டமன்றக் கூட்டத்தொடரின் இறுதிநாளில் அவசர அவசரமாக தமிழ்நாடு தனியார் பல்கலைக்கழகத் திருத்தச்சட்டம் – 2026ஐ தவெக அரசு நிறைவேற்றியுள்ளது வன்மையான கண்டனத்துக்குரியது' என்று தெரிவித்துள்ளார்.
முன்னதாக, 2019 ஆம் ஆண்டு அதிமுக ஆட்சியில் இயற்றப்பட்ட சட்டத்தின்படி, புதிய தனியார் பல்கலைக்கழகம் அமைக்க 100 ஏக்கர் நிலமும், ரூ.50 கோடி நிரந்தர வைப்புத்தொகையும் தேவைப்பட்டது. ஆனால், தற்போதைய திருத்தச்சட்டத்தின்படி, சென்னை மாநகராட்சிப் பகுதிகளில் 12 ஏக்கர், பிற மாநகராட்சிகள் மற்றும் நகராட்சிகளில் 18 ஏக்கர், ஊரகப் பகுதிகளில் 25 ஏக்கர் நிலம் போதுமானது. மேலும், நிரந்தர வைப்புத்தொகையும் ரூ.50 கோடியிலிருந்து ரூ.25 கோடியாகக் குறைக்கப்பட்டுள்ளது.
இந்தச் சட்டத்திருத்தம், தற்போது அரசின் கட்டுப்பாட்டில் உள்ள கல்லூரிகளைத் தனியார் பல்கலைக்கழகங்களாக மாற்ற வழிவகுக்கும் என்றும், இது கடந்த 2008 மற்றும் 2025 ஆம் ஆண்டுகளில் திமுக அரசு கொண்டுவர முயன்று, கடும் எதிர்ப்பால் கைவிடப்பட்ட சட்ட வரைவுக்கு ஒப்பானது என்றும் சீமான் குறிப்பிட்டுள்ளார்.
தற்போதைய தவெக அரசு, முந்தைய திமுக அரசால் கைவிடப்பட்ட இந்தத் திருத்தச்சட்டத்தை 'தமிழ்நாடு தனியார் பல்கலைக்கழகத் திருத்தச் சட்ட வரைவு – 2026' என்ற பெயரில் வேகவேகமாக நிறைவேற்றியுள்ளது. இது தமிழ்நாட்டு ஏழை மாணவர்களின் உயர்கல்வி வாய்ப்பைப் பறிக்கும் கொடுஞ்செயல் என்று சீமான் கடுமையாக விமர்சித்துள்ளார்.
உயர் கல்வித்துறை மானியக் கோரிக்கை விவாதம் முடிந்து இரண்டு வாரங்களுக்குப் பிறகு, சட்டமன்றக் கூட்டத்தொடரின் இறுதிநாளில் இப்படியொரு சட்டத்திருத்தத்தை அவசரமாக நிறைவேற்ற வேண்டிய அவசியம் என்ன? யாருடைய உத்தரவின் பேரில், யாருடைய இலாபத்திற்கு இது நிறைவேற்றப்பட்டது? என்றும் அவர் கேள்வி எழுப்பியுள்ளார்.
இந்தத் திருத்தச்சட்டத்தின்படி, தமிழ்நாட்டில் இயங்கிவரும் ஏறத்தாழ 163 அரசு உதவி பெறும் கல்லூரிகள் தனியார் பல்கலைக்கழகங்களாக மாறும் வாய்ப்புள்ளது. அவ்வாறு மாறினால், சமூக நீதிக்கான இட ஒதுக்கீட்டு முறையைக் கடைப்பிடிக்க வேண்டிய கட்டாயம் இருக்காது. மேலும், ஏழை மாணவர்களுக்கான கட்டண சலுகையும் இருக்காது. நன்கொடை என்ற பெயரில் தனியார் பல்கலைக்கழகங்கள் தங்களுக்கு வேண்டிய பணத்தைப் பெற்றுக்கொண்டு, மாணவர் சேர்க்கையை நடத்திக்கொள்ளும் சூழல் உருவாகும். இதனால் கிராமப்புற ஏழை மாணவர்களின் உயர்கல்வி கனவு கானல் நீராகும் என்றும் அவர் அச்சம் தெரிவித்துள்ளார்.
மேலும், 100 விழுக்காடு அரசின் கட்டுப்பாட்டில் இருந்த தனியார் மருத்துவக் கல்லூரிகள், மருத்துவப் பல்கலைக்கழகங்களாக மாறினால், அரசு ஒதுக்கீட்டிற்கு 50 முதல் 65 விழுக்காடு இடங்களை மட்டும் கொடுத்தால் போதும் என்ற நிலை உருவாகும். கல்வி கட்டணம், பாடத்திட்டம் ஆகியவற்றைப் பொறுத்தவரைத் தனியார் பல்கலைக்கழகங்களை தமிழக அரசால் கட்டுப்படுத்த முடியாது. அரசு உதவி பெறும் கல்லூரிகளில் பணியாற்றும் ஆசிரியர்கள் மற்றும் பணியாளர்கள் அனைவரும் தங்கள் பணிப் பாதுகாப்பை இழக்கும் ஆபத்தும் உள்ளது. ஏற்கனவே, அரசு உதவி பெறும் கல்லூரிகளில் பணியாற்றும் 5000க்கும் மேற்பட்ட பேராசிரியர்களுக்குப் பணி மேம்பாடு வழங்கப்படாத நிலையில், இச்சட்டம் நடைமுறைக்கு வந்தால், ஊழியர்களுக்கான சட்டப்படியான பணிப்பாதுகாப்பும், சலுகைகளும் மறுக்கப்படும் என்றும் சீமான் சுட்டிக்காட்டியுள்ளார்.
எனவே, தமிழ்நாட்டிலுள்ள தனியார் சுயநிதி கல்லூரிகள் மற்றும் அரசு உதவிபெறும் கல்லூரிகள், தற்போதைய விதிமுறை தளர்வுகளைப் பயன்படுத்தித் தனியார் பல்கலைக்கழகங்களாக மாறினால், அவை மாணவர்களுக்கான கல்விச் சேவை என்பதிலிருந்து தடம்மாறி, முழுக்க முழுக்க இலாபமீட்டும் வணிக நிறுவனங்களாகவே மாறிவிடும். இதனால் உயர்கல்வியின் தரம் குறைந்து, வசதி படைத்தவர்களுக்கு மட்டுமே கல்வி என்ற நிலையும் உருவாகிவிடும்.
இந்தச் சட்டத்திருத்தம் மூலம், ஆட்சிப்பொறுப்பேற்ற 100 நாட்களில் தமிழ்நாட்டின் கல்வி கட்டமைப்பை தவெக அரசு சிதைத்துள்ளதுதான் அதன் மிகப்பெரிய சாதனையாகும். நாட்டின் எதிர்காலத் தலைமுறையினருக்கு அடிப்படையாக வழங்க வேண்டிய கல்வியைக் கூட வழங்க முடியாமல் தனியாருக்கு தாரைவார்ப்பதுதான் மக்களுக்கான ஆட்சியா? ஒரு புறம் சமூக நீதி அரசு என்று பெருமை பேசிக்கொண்டு, மறுபுறம் இது போன்ற கொடும் சட்டத்திருத்தத்தைக் கொண்டு வந்து, இட ஒதுக்கீடு முறையை ஒழித்து, ஏழை எளிய மாணவர்களை வஞ்சிப்பதுதான் தூயசக்தியா? அரசின் கட்டுப்பாட்டில் இருந்த கல்லூரிகளுக்குச் சலுகைகளை வாரி வழங்கி, விதிமுறைகளை தளர்த்தி, தனியார் முதலாளிகள் இலாபமீட்ட வழிவகுப்பதுதான் ஊழல், இலஞ்சத்தை ஒழிக்கும் முறையா? வெட்கக்கேடு! என்று சீமான் தனது அறிக்கையில் தெரிவித்துள்ளார்.
ஆகவே, தமிழ்நாட்டின் கல்வி கட்டமைப்பைச் சிதைத்து, ஏழை மாணவர்களின் உயர் கல்வி வாய்ப்பைப் பறித்து, கல்வியை வணிகமயமாக்கும் தமிழ்நாடு தனியார் பல்கலைக்கழகத் திருத்தச்சட்டம் – 2026ஐ தமிழ்நாடு அரசு உடனடியாகத் திரும்பப்பெற வேண்டுமென நாம் தமிழர் கட்சி சார்பாக வலியுறுத்துகிறேன்” என்று சீமான் குறிப்பிட்டுள்ளார்.
