தமிழக அரசின் அமைச்சரவை விரிவாக்கத்தை எஸ்.டி.பி.ஐ. கட்சி வரவேற்றுள்ளது. குறிப்பாக, கூட்டணிக் கட்சிகளான இந்திய யூனியன் முஸ்லிம் லீக் மற்றும் வி.சி.க.வைச் சேர்ந்த எம்.எல்.ஏ.க்களுக்கு அமைச்சர் பதவி வழங்கப்பட்டதை அக்கட்சி பாராட்டியுள்ளது.
எஸ்.டி.பி.ஐ. கட்சியின் மாநிலத் தலைவர் முகம்மது முபாரக் வெளியிட்ட அறிக்கையில், 'த.வெ.க. தலைமையிலான தமிழக அரசின் அமைச்சரவை விரிவாக்கத்தில், கூட்டணிக் கட்சியான இந்திய யூனியன் முஸ்லிம் லீக் கட்சியின் பாபநாசம் தொகுதி எம்.எல்.ஏ. ஷாஜகானுக்கும், வி.சி.க.வின் திண்டிவனம் தொகுதி எம்.எல்.ஏ. வன்னி அரசுவுக்கும் அமைச்சரவையில் இடம் அளிக்கப்பட்டுள்ளது. இதை எங்கள் கட்சி மனதார வரவேற்கிறது' என்று தெரிவித்துள்ளார்.
அதே சமயம், சமூக நீதியின் அடிப்படையில் இந்த அமைச்சரவை விரிவாக்கத்தை உற்றுநோக்கும்போது சில நியாயமான ஆதங்கங்களையும் எஸ்.டி.பி.ஐ. கட்சி முன்வைத்துள்ளது. அனைத்து சமூகங்களுக்கும் மக்கள் தொகை விகிதாச்சாரத்தை விட கூடுதல் இடங்கள் இந்த த.வெ.க. அரசில் ஒதுக்கப்பட்டுள்ளதாகக் கூறப்பட்டாலும், சிறுபான்மை முஸ்லிம் சமூகத்திற்கு அளிக்கப்பட்டுள்ள பிரதிநிதித்துவம் மிகக் குறைவாகவே உள்ளது என்பதைச் சுட்டிக்காட்ட விரும்புவதாகவும் அக்கட்சி குறிப்பிட்டுள்ளது.
அனைத்து சமூகத்தின் பங்களிப்பையும், உரிய பிரதிநிதித்துவத்தையும் உறுதிபடுத்துவது அரசின் கடமை என்பதை எஸ்.டி.பி.ஐ. கட்சி வலியுறுத்தியுள்ளது. இந்த அமைச்சரவை விரிவாக்கம் ஒருபுறம் வரவேற்கப்பட்டாலும், சிறுபான்மையினர் பிரதிநிதித்துவம் குறித்த கேள்விகளை அக்கட்சி எழுப்பியுள்ளது.
