சேலம் மாநகரின் காவல் தெய்வமாக விளங்கும் கோட்டை மாரியம்மன் கோவிலில் ஆண்டுதோறும் ஆடி மாதத்தில் 22 நாட்கள் ஆடிப்பெருவிழா வெகு விமரிசையாக கொண்டாடப்படுகிறது. இந்த ஆண்டுக்கான திருவிழா கடந்த ஜூலை 21ஆம் தேதி தொடங்கி நடைபெற்று வருகிறது. இந்த விழாவின்போது, நூற்றுக்கணக்கான பக்தர்கள் பொங்கல் வைத்தும், மாவிளக்கு ஏற்றியும், உருளுதண்டம் செய்தும், அக்னி கரகம் எடுத்தும், அலகு குத்தியும் நேர்த்திக்கடன்களை செலுத்தி அம்மனை வழிபடுகின்றனர்.
இந்த பிரசித்தி பெற்ற கோட்டை மாரியம்மன் கோவில் திருவிழாவை முன்னிட்டு, சேலம் மாவட்டத்திற்கு ஆகஸ்ட் 5ஆம் தேதி உள்ளூர் விடுமுறை அறிவிக்கப்பட்டுள்ளது. இந்த அறிவிப்பை சேலம் மாவட்ட ஆட்சியர் இளம்பகவத் வெளியிட்டுள்ளார். அன்றைய தினம் சேலம் மாவட்டத்தில் உள்ள அனைத்து அரசு அலுவலகங்கள், பள்ளி மற்றும் கல்லூரிகளுக்கு உள்ளூர் விடுமுறை பொருந்தும்.
இருப்பினும், மாவட்ட மற்றும் சார்நிலை கருவூலங்கள், அத்தியாவசியப் பணிகளை மேற்கொள்ளும் குறிப்பிட்ட பணியாளர்களுடன் வழக்கம் போல் செயல்படும் என்றும் தெரிவிக்கப்பட்டுள்ளது. இந்த உள்ளூர் விடுமுறைக்கு ஈடுசெய்யும் வகையில், ஆகஸ்ட் 8ஆம் தேதி அனைத்து அரசு அலுவலகங்கள், பள்ளி மற்றும் கல்லூரிகளுக்கு பணி நாளாக அறிவிக்கப்பட்டுள்ளது. இந்த தகவல்களை மாவட்ட ஆட்சியர் தனது அறிவிப்பில் உறுதிப்படுத்தியுள்ளார்.
