இந்திய கிரிக்கெட் அணியின் முன்னாள் கேப்டனும், சிறந்த தொடக்க ஆட்டக்காரருமான ரோஹித் சர்மாவை, பாகிஸ்தான் அணியின் ஆல்-ரவுண்டர் ஷதாப் கான் தனது டி20 அணியில் கேப்டனாகத் தேர்வு செய்துள்ளது பெரும் விவாதத்தை ஏற்படுத்தியுள்ளது. உலகளவில் சிறந்த டி20 வீரர்களை தேர்வு செய்யும் நிகழ்ச்சியில், ஷதாப் கான் தனது சொந்த நாடான பாகிஸ்தானைச் சேர்ந்த ஒரு வீரருக்குக் கூட இடம் கொடுக்காமல் இந்த முடிவை எடுத்துள்ளார்.
க்ரிக்விக் என்ற ஊடக நிகழ்ச்சியில் பங்கேற்ற ஷதாப் கான், சிறந்த தொடக்க வீரராகவும், கேப்டனாகவும் ரோஹித் சர்மாவைத் தேர்ந்தெடுத்தார். ரோஹித் சர்மா இந்திய அணிக்காக 171 டி20 போட்டிகளில் விளையாடி, 5 சதங்கள் மற்றும் 32 அரைசதங்கள் உட்பட 4,620 ரன்களைக் குவித்துள்ளார். மேலும், இந்திய அணிக்கு 2024 டி20 உலகக்கோப்பையையும், மும்பை இந்தியன்ஸ் அணிக்கு 5 ஐபிஎல் கோப்பைகளையும் வென்று கொடுத்து, சர்வதேச அளவில் ஒரு சிறந்த டி20 கேப்டனாக அவர் திகழ்கிறார்.
விக்கெட் கீப்பராக தென்னாப்பிரிக்காவின் குவின்டன் டி காக்கை (106 போட்டிகளில் 2,584 ரன்கள்) ஷதாப் கான் தேர்வு செய்துள்ளார். வெஸ்ட் இண்டீஸ் அணியின் அதிரடி பேட்ஸ்மேன் நிக்கோலஸ் பூரனை சிறந்த அதிரடி ஆட்டக்காரராகத் தேர்ந்தெடுத்துள்ளார்.
சிறந்த ஆல்-ரவுண்டராக, கீரன் பொல்லார்ட்டை ஷதாப் கான் குறிப்பிட்டுள்ளார். அவர் தனது டி20 பயணத்தில் 746 போட்டிகளில் விளையாடி, 14,800-க்கும் அதிகமான ரன்களையும், 300-க்கும் மேற்பட்ட விக்கெட்டுகளையும் வீழ்த்தியுள்ளார்.
பந்துவீச்சுப் பிரிவில், அதிவேகப் பந்துவீச்சாளராக நியூசிலாந்தின் ஷேன் பாண்டை ஷதாப் கான் தேர்வு செய்துள்ளார். சுழற்பந்து வீச்சாளராக, டி20 கிரிக்கெட்டில் 600-க்கும் மேற்பட்ட விக்கெட்டுகளையும், 4,500-க்கும் மேற்பட்ட ரன்களையும் குவித்துள்ள சுனில் நரைனைத் தேர்ந்தெடுத்துள்ளார்.
பாகிஸ்தான் அணியில் பாபர் அசாம், ஷஹீன் அப்ரிதி போன்ற சிறந்த டி20 வீரர்கள் பலர் இருந்தபோதிலும், ஷதாப் கான் தனது சொந்த நாட்டு வீரர்களுக்கு இடம் அளிக்காதது சமூக வலைதளங்களில் தீவிர விவாதத்தை உருவாக்கியுள்ளது. பாகிஸ்தானில் ஒரு சிறந்த டி20 வீரர் கூட இல்லையா என்ற கேள்வியும் எழுப்பப்பட்டுள்ளது.
ஷதாப் கானின் இந்த பட்டியல், கிரிக்கெட் ரசிகர்கள் மத்தியில் பல்வேறு கருத்துப் பரிமாற்றங்களுக்கு வழிவகுத்துள்ளது. ரோஹித் சர்மாவின் கேப்டன்சி திறனையும், அவரது சர்வதேச சாதனைகளையும் பலர் பாராட்டி வருகின்றனர். அதே சமயம், பாகிஸ்தான் வீரர்களை புறக்கணித்ததை விமர்சிப்பவர்களும் உள்ளனர்.
