தரம்சாலாவில் நடைபெறும் ஐபிஎல் 2026 முதல் குவாலிபையர் போட்டியில், டாஸ் வென்ற குஜராத் டைட்டன்ஸ் அணி முதலில் பந்துவீச்சைத் தேர்வு செய்துள்ளது. இந்தப் போட்டியில் வெற்றி பெறும் அணி நேரடியாக இறுதிப்போட்டிக்குத் தகுதி பெறும் என்பதால் பெரும் எதிர்பார்ப்பு நிலவுகிறது.
டாஸ் வென்ற பிறகு பேசிய குஜராத் கேப்டன் ஷுப்மன் கில், 'இந்த மைதானத்தில் இரண்டாவது இன்னிங்ஸில் பனிப்பொழிவு இருக்க வாய்ப்புள்ளது. எனவே இலக்கை விரட்டுவதே சிறந்தது எனக் கருதுகிறோம். அணியில் அர்ஷத் கானுக்குப் பதிலாக குல்வந்த் கெஜ்ரோலியா சேர்க்கப்பட்டுள்ளார்' எனத் தெரிவித்தார்.
பெங்களூரு அணியின் கேப்டன் ரஜத் படிதார் கூறுகையில், 'ஆடுகளம் பேட்டிங்கிற்குச் சாதகமாக உள்ளது. முதலில் பேட்டிங் செய்து ஒரு பெரிய ரன் எண்ணிக்கையை இலக்காக நிர்ணயிப்போம். இதன் மூலம் குஜராத் அணிக்கு நெருக்கடி கொடுக்க முடியும்' என்றார். பெங்களூரு அணி எந்த மாற்றமும் இன்றி பலமான அணியுடன் களம் இறங்குகிறது.
தரம்சாலா மைதானம் வேகப்பந்து வீச்சுக்குச் சாதகமானது என்பதால், ஆரம்ப ஓவர்களில் இரு அணிகளின் வேகப்பந்து வீச்சாளர்களும் தாக்கத்தை ஏற்படுத்துவார்கள் என எதிர்பார்க்கப்படுகிறது. விராட் கோலி மற்றும் சுப்மன் கில் ஆகிய இரு நட்சத்திர வீரர்களின் அதிரடியைக் காண ரசிகர்கள் ஆவலுடன் காத்திருக்கின்றனர். குஜராத் டைட்டன்ஸ் அணி: சாய் சுதர்சன், சுப்மன் கில் (கேப்டன்), ஜோஸ் பட்லர், வாஷிங்டன் சுந்தர், நிஷாந்த் சிந்து, ஜேசன் ஹோல்டர், ரஷித் கான், குல்வந்த் கெஜ்ரோலியா, ககிசோ ரபாடா, முகமது சிராஜ், பிரசித் கிருஷ்ணா. ராயல் சேலஞ்சர்ஸ் பெங்களூரு அணி: வெங்கடேஷ் ஐயர், விராட் கோலி, தேவ்தத் படிக்கல், ரஜத் படிதார் (கேப்டன்), ஜித்தேஷ் சர்மா, டிம் டேவிட், குருணால் பாண்டியா, புவனேஷ்வர் குமார், ஜேக்கப் டஃபி, ஜோஷ் ஹேசில்வுட், ரசிக் சலாம் தார்.
