தரம்சலா: ஐபிஎல் 2026 சீசனின் 61வது லீக் ஆட்டத்தில், ராயல் சேலஞ்சர்ஸ் பெங்களூரு அணி 20 ஓவர்களில் 222 ரன்கள் என்ற பிரம்மாண்ட இலக்கை நிர்ணயித்து பஞ்சாப் கிங்ஸ் அணியை மலைக்க வைத்தது. வெங்கடேஷ் ஐயரின் அதிரடி அரைசதமும், விராட் கோலியின் சிறப்பான ஆட்டமும் இந்த ஸ்கோர் உயர முக்கிய காரணமாக அமைந்தது. தரம்சலாவில் நடந்த இந்தப் போட்டியில், டாஸ் வென்ற பஞ்சாப் கேப்டன் ஸ்ரேயாஸ் ஐயர் முதலில் பந்துவீச முடிவு செய்தார்.
பெங்களூரு அணியின் தொடக்க வீரர் ஜேக்கப் பெத்தேல் 11 ரன்களில் ஆட்டமிழந்தாலும், அடுத்தடுத்து வந்த வீரர்கள் பஞ்சாப் பந்துவீச்சை நாலாபுறமும் சிதறடித்தனர். குறிப்பாக, விராட் கோலி மற்றும் தேவ்தத் படிக்கல் ஜோடி அதிரடியாக விளையாடி ரன்களை குவித்தனர். பவர்பிளே ஓவர்களில் பெங்களூரு அணி 61 ரன்களை எட்டியது. படிக்கல் 25 பந்துகளில் 45 ரன்கள் அடித்து வெளியேறினார். மறுபுறம், கிளாசிக் ஆட்டத்தை வெளிப்படுத்திய விராட் கோலி 37 பந்துகளில் 4 பவுண்டரி, 3 சிக்ஸர்களுடன் 58 ரன்கள் எடுத்து அசத்தினார்.
விராட் கோலி ஆட்டமிழந்த பிறகு, வெங்கடேஷ் ஐயர் பொறுப்பேற்று பஞ்சாப் பந்துவீச்சாளர்களை திணறடித்தார். மைதானத்தின் அனைத்துப் பகுதிகளுக்கும் பந்துகளை பறக்கவிட்ட அவர், 40 பந்துகளில் 8 பவுண்டரிகள் மற்றும் 4 சிக்ஸர்களுடன் 73 ரன்கள் குவித்து ஆட்டமிழக்காமல் களத்தில் நின்றார். கடைசி ஓவர்களில் டிம் டேவிட் 12 பந்துகளில் 28 ரன்கள் விளாசி ஸ்கோரை 220 ரன்களைத் தாண்டச் செய்தார். இறுதியில், 20 ஓவர்கள் முடிவில் பெங்களூரு அணி 4 விக்கெட் இழப்புக்கு 222 ரன்கள் குவித்தது.
பஞ்சாப் தரப்பில் ஹர்ப்ரீத் ப்ரார் 4 ஓவர்களில் 35 ரன்கள் விட்டுக்கொடுத்து 2 விக்கெட்டுகளை வீழ்த்தினார். அர்ஷ்தீப் சிங் மற்றும் யுஸ்வேந்திர சாகல் தலா ஒரு விக்கெட் எடுத்தனர். இருப்பினும், லோக்கி பெர்குசன் 3 ஓவர்களில் 43 ரன்களையும், சாகல் 3 ஓவர்களில் 42 ரன்களையும் வாரி இறைத்தது பஞ்சாப் அணிக்கு பின்னடைவாக அமைந்தது.
