இன்றைய வேகமான வாழ்க்கைச் சூழலில், பலரும் வாரத்திற்குத் தேவையான அசைவ உணவை ஒரே நாளில் சமைத்து ஃப்ரிட்ஜில் சேமித்து வைத்துப் பயன்படுத்துகின்றனர். சிலர் பச்சை கறியை நீண்ட நாட்கள் ஃப்ரீசரில் சேமிக்கின்றனர், மற்றவர்கள் சமைத்த குழம்பு அல்லது வறுவலை ஓரிரு நாட்கள் பயன்படுத்துகின்றனர். எனினும், இவ்வாறு ஃப்ரிட்ஜில் சேமித்து வைக்கும் உணவுப் பொருட்கள் உடலுக்குப் பாதுகாப்பானதா, கறி கெட்டுப் போகாமல் ஆரோக்கியமாகப் பதப்படுத்துவது எப்படி என்பது குறித்து விரிவாகப் பார்க்கலாம்.
சமைக்காத பச்சை கறியை சாதாரண ஃப்ரிட்ஜ் தட்டில் வைத்தால், அது 1 முதல் 2 நாட்கள் வரை மட்டுமே பயன்படுத்த உகந்ததாக இருக்கும். ஆனால், அதை டீப் ஃப்ரீஸரில் சேமித்து வைக்கும்போது, 9 மாதங்கள் முதல் ஒரு வருடம் வரை கூடப் பயன்படுத்தலாம். இதுவே சமைத்த சிக்கன் எனில், சாதாரண ஃப்ரிட்ஜ் தட்டில் 3 முதல் 4 நாட்கள் வரையிலும், டீப் ஃப்ரீஸரில் 2 முதல் 6 மாதங்கள் வரையிலும் பயன்படுத்தலாம்.
பாக்டீரியாக்கள் பெருகாமல் உணவைப் பதப்படுத்த சில முக்கிய விதிகள் உள்ளன. ஃப்ரிட்ஜின் உட்புற வெப்பநிலை எப்போதும் 4 டிகிரி செல்சியஸ் அல்லது அதற்குக் குறைவாகவும், ஃப்ரீஸரின் வெப்பநிலை -18 டிகிரி செல்சியஸ் என்ற அளவிலும் இருக்க வேண்டும். இந்த உறைநிலை பாக்டீரியாக்களின் வளர்ச்சியைத் தடுத்து உணவைப் பாதுகாக்கிறது.
சமைக்காத பச்சைக் கறியை எப்போதும் ஃப்ரிட்ஜின் மிகக் கீழ் தட்டில் வைக்க வேண்டும். இதன் மூலம், கறையிலிருந்து கசியும் நீர் மற்ற காய்கறிகள் அல்லது சமைத்த உணவுகள் மீது சிதறி, அவை நச்சுத்தன்மை அடைவது தவிர்க்கப்படும். இது மிகவும் முக்கியமான பாதுகாப்பு முறையாகும்.
கடையிலிருந்து வாங்கி வந்த கறியை காற்று புகாத ஜிப்லாக் பைகள் அல்லது 'ஏர்டைட்' டப்பாவில் அடைத்துச் சேமிக்க வேண்டும். ஃப்ரீஸரில் 2 மாதங்களுக்கும் மேலாகச் சேமிக்கத் திட்டமிட்டால், அலுமினியம் ஃபாயில் அல்லது ஃப்ரீஸர் பேப்பரால் கறியை நன்றாகச் சுற்றி வைப்பது அவசியம். இது கறியின் தரத்தைப் பாதுகாக்கும்.
சமைக்காத கறியாக இருந்தாலும் சரி, சமைத்த மீதி உணவாக இருந்தாலும் சரி, அறை வெப்பநிலையில் 2 மணி நேரத்திற்கு மேல் வெளியில் வைத்திருக்கக் கூடாது. குறிப்பாக, கோடைக்காலத்தில் 1 மணி நேரத்திற்குள்ளாகவே ஃப்ரிட்ஜில் வைத்துவிட வேண்டும். இது '2 மணி நேர விதி' என அழைக்கப்படுகிறது.
ஃப்ரீஸரில் உறைந்துள்ள கறியை சமைப்பதற்கு முன், திறந்த வெளியில் வைக்காமல், சமைப்பதற்கு முந்தைய நாள் இரவே ஃப்ரீஸரிலிருந்து எடுத்து சாதாரண ஃப்ரிட்ஜ் தட்டிற்கு மாற்றுவதே பாதுகாப்பான வழி. மைக்ரோவேவ் மூலம் பனிக்கட்டியை உருக்கினால், அதை உடனடியாகச் சமைத்துவிட வேண்டும்.
ஃப்ரிட்ஜில் வைத்த சிக்கன் லேசான சாம்பல் நிறமாக மாறினாலோ, வழுவழுப்பான பிசுபிசுப்புத் தன்மையுடன் துர்நாற்றம் வீசினாலோ, அது கெட்டுப்போய்விட்டது என்பதை உணர்த்தும் அறிகுறியாகும். இதுபோன்ற சமயங்களில் அதை உடனடியாகக் குப்பையில் வீசிவிடுவது நல்லது.
