தமிழ்நாட்டில் வெங்காய விலை உயர்வை கட்டுப்படுத்தும் நோக்கில், தமிழ்நாடு அரசு முக்கிய நடவடிக்கையை எடுத்துள்ளது. பொதுமக்களுக்கு நியாயமான விலையில் வெங்காயம் கிடைப்பதை உறுதி செய்யும் வகையில், கூட்டுறவுத் துறையின் கீழ் இயங்கும் நியாய விலைக் கடைகள் மூலம் ஒரு கிலோ வெங்காயம் வெறும் 35 ரூபாய்க்கு விற்பனை செய்யப்படுகிறது.
கூட்டுறவு உணவு மற்றும் நுகர்வோர் துறை வெளியிட்டுள்ள செய்திக்குறிப்பின்படி, அத்தியாவசியப் பொருளான வெங்காயத்தின் விலை சமீப காலமாக உயர்ந்து வருவதைக் கட்டுப்படுத்த, சந்தை குறுக்கீட்டு நடவடிக்கையாக அரசு வெங்காயத்தை கொள்முதல் செய்து விற்பனை செய்ய முடிவு செய்துள்ளது. இந்த விற்பனை முதற்கட்டமாக இந்திய தேசிய வேளாண் கூட்டுறவு சந்தைப்படுத்துதல் கூட்டமைப்பின் மூலமும், இரண்டாம் கட்டமாக அதே கூட்டமைப்பு மற்றும் தேசிய நுகர்வோர் கூட்டுறவு இணையத்திடமிருந்தும் கொள்முதல் செய்யப்பட்ட வெங்காயம் மூலம் நடைபெற்றது.
தொடர்ந்து, மூன்றாம் கட்டமாக, கூட்டுறவுத் துறையின் கீழ் செயல்படும் 8,914 நகர்ப்புற நியாய விலைக் கடைகள் மற்றும் கூட்டுறவு அங்காடிகளில் ஒரு குடும்ப அட்டைக்கு ஒரு கிலோ வெங்காயம் 35 ரூபாய் என்ற விலையில் விற்பனை செய்ய நடவடிக்கை எடுக்கப்பட்டுள்ளது. பொதுமக்களின் தொடர்ச்சியான தேவை மற்றும் வரவேற்பைக் கருத்தில் கொண்டு, தேசிய நுகர்வோர் கூட்டுறவு இணையத்திடமிருந்து மேலும் 700 மெட்ரிக் டன் வெங்காயம் கொள்முதல் செய்யப்பட்டுள்ளது. இந்த வெங்காயம் பல்வேறு போக்குவரத்து மூலமாக மாவட்டங்களில் உள்ள நியாயவிலைக்கடைகள் மற்றும் கூட்டுறவு அங்காடிகளுக்கு கொண்டு சேர்க்கும் பணிகள் நடைபெற்று வருகின்றன.
இந்த வெங்காய விற்பனை, சென்னை மாநகராட்சியில் அக்டோபர் 10 முதல் தொடங்குகிறது. மற்ற மாவட்டங்களில் உள்ள நகர்ப்புற நியாய விலைக் கடைகள் மற்றும் கூட்டுறவு அங்காடிகளில் அக்டோபர் 11 முதல் குடும்ப அட்டைதாரர்களுக்கு வெங்காயம் விற்பனை செய்யப்படும். குடும்ப அட்டைதாரர்கள் தங்களுக்கு அருகிலுள்ள நியாயவிலைக் கடைகளில் இந்த வெங்காயத்தைப் பெற்று பயனடையலாம்.
இந்த நடவடிக்கையின் மூலம், வெங்காயத்தின் விலை உயர்வால் பொதுமக்களுக்கு ஏற்படும் பொருளாதாரச் சுமையைக் குறைத்து, குறிப்பாக ஏழை, எளிய மற்றும் நடுத்தரக் குடும்பங்களுக்கு வெங்காயம் நியாயமான விலையில் தொடர்ந்து கிடைப்பதை தமிழ்நாடு அரசு உறுதி செய்துள்ளது. இது பொதுமக்களிடையே பெரும் வரவேற்பைப் பெற்றுள்ளது.
மேலும், கூட்டுறவுத் துறையின் கீழ் இயங்கும் நியாய விலைக் கடைகளில் வெங்காயம் விற்பனை தொடர்பான புகார்கள் மற்றும் குறைகளை பொதுமக்கள் 96005 61969 என்ற வாட்ஸ்அப் எண்ணில் தெரிவிக்கலாம் என்றும் தெரிவிக்கப்பட்டுள்ளது. இந்த எண்ணின் மூலம் பொதுமக்கள் தங்கள் கருத்துக்களையும், குறைகளையும் நேரடியாக அரசுக்கு தெரிவிக்க முடியும்.
