சூப்பர் ஸ்டார் ரஜினிகாந்த் நடிப்பில் வெளியான 'ஜெயிலர்' திரைப்படத்தின் இரண்டாம் பாகமான 'ஜெயிலர் 2' படத்தின் ஓடிடி உரிமை, இந்த ஆண்டின் மிகப்பெரிய தொகையான ₹160 கோடிக்கு விற்பனை செய்யப்பட்டுள்ளது. இதன் மூலம், நடிகர் விஜய் நடிப்பில் வெளியான 'லியோ' படத்தின் சாதனையை ரஜினிகாந்த் முறியடித்துள்ளார்.
நெல்சன் திலீப்குமார் இயக்கத்தில் 2023 ஆம் ஆண்டு வெளியாகி மிகப்பெரிய வெற்றி பெற்ற திரைப்படம் 'ஜெயிலர்'. இதில் ரஜினிகாந்த் உடன் ரம்யா கிருஷ்ணன், யோகி பாபு, சிவராஜ் குமார், மோகன்லால், சுனில் போன்ற பல தென்னிந்திய நட்சத்திரங்கள் நடித்திருந்தனர். இப்படம் பாக்ஸ் ஆபிஸில் ₹500 கோடிக்கும் அதிகமாக வசூலித்து சாதனை படைத்தது. படக்குழுவினருக்கும், தொழில்நுட்ப கலைஞர்களுக்கும் தயாரிப்பு நிறுவனமான சன் பிக்சர்ஸ் சார்பில் விலை உயர்ந்த பரிசுகள் வழங்கப்பட்டன.
'ஜெயிலர்' படத்தின் மாபெரும் வெற்றியைத் தொடர்ந்து, அதன் இரண்டாம் பாகத்தை சன் பிக்சர்ஸ் நிறுவனம் தயாரிக்கும் பணிகளைத் தொடங்கியது. கடந்த ஆண்டு படப்பிடிப்பு தொடங்கிய இந்த படத்திற்கும், முதல் பாகத்தைப் போலவே அனிருத் இசையமைப்பாளராக பணிபுரிகிறார். முதல் பாகத்தில் நடித்த பல நடிகர்கள் இரண்டாம் பாகத்திலும் தங்கள் கதாபாத்திரங்களில் நடித்துள்ளனர்.
'ஜெயிலர் 2' படத்தில் ஒரு முக்கிய கதாபாத்திரத்தில் நடிக்க தெலுங்கு நடிகர் பாலகிருஷ்ணா மற்றும் பாலிவுட் நடிகர் ஷாருக்கானிடம் பேச்சுவார்த்தை நடந்ததாகவும், இறுதியாக ஹிருத்திக் ரோஷன் ஒப்பந்தம் செய்யப்பட்டதாகவும் தகவல்கள் வெளியாகியுள்ளன.
தற்போது வெளிவந்துள்ள தகவல்களின்படி, 'ஜெயிலர் 2' திரைப்படத்தின் ஓடிடி உரிமை ₹160 கோடிக்கு விற்பனை செய்யப்பட்டுள்ளது. இது இந்த ஆண்டின் மிக உயர்ந்த ஓடிடி விற்பனை தொகையாகும். இதற்கு முன்னர் நடிகர் விஜய் நடிப்பில் வெளியான 'லியோ' படத்தின் ஓடிடி உரிமை ₹120 கோடிக்கு விற்பனையாகி ஒரு சாதனையாக கருதப்பட்டது.
'ஜெயிலர்' படத்தின் முதல் பாகத்தின் ஓடிடி உரிமைகள் ₹75 கோடிக்கு மட்டுமே விற்பனையாகின. ரஜினி நடிப்பில் வெளியான 'கூலி' திரைப்படத்தின் ஓடிடி உரிமை ₹120 கோடிக்கு விற்பனையானது. தற்போது 'ஜெயிலர் 2' திரைப்படம், 'லியோ' படத்தின் சாதனையை முறியடித்து புதிய உச்சத்தை எட்டியுள்ளது.
தற்போது 'ஜெயிலர் 2' திரைப்படத்தின் ஆடியோ வெளியீட்டு விழா மற்றும் விளம்பர நிகழ்ச்சிகளுக்கான ஏற்பாடுகள் தீவிரமாக நடைபெற்று வருவதாக தகவல்கள் தெரிவிக்கின்றன.
