கடலூர் மாவட்டம், விருத்தாசலத்தில் தே.மு.தி.க. பொதுச்செயலாளர் பிரேமலதா விஜயகாந்த் செய்தியாளர்களை சந்தித்து பேசினார். அப்போது அவர், 'லஞ்சம் இல்லாத ஆட்சிதான் தற்போது நடப்பதாக கூறுகின்றனர். ஆனால் மறைமுகமாக பல்வேறு பிரச்சனைகள் உள்ளன. லஞ்சம், ஊழல் இல்லாத நேர்மையான ஆட்சி அமைய வேண்டும் என்று மக்களுக்காக வாழ்ந்தவர் மறைந்த தே.மு.தி.க. தலைவர் விஜயகாந்த். ஆனால், அவருக்கு மக்கள் வாய்ப்பு அளிக்கவில்லை. ஏமாற்றுபவர்களுக்கும், பொய் பேசுபவர்களுக்கும், நடிப்பவர்களுக்கும் தான் மக்கள் தற்போது வாக்களிக்கின்றனர். இது வருத்தமளிக்கிறது.
எனது தொகுதியில் கடந்த மூன்று மாதங்களில் மட்டும் ஒரு லட்சம் மனுக்களை மக்களிடமிருந்து பெற்றுள்ளேன். மக்களுக்காக உண்மையாக உழைப்பவர்களுக்கு ஆதரவு தராமல், வேறு யாருக்கோ வாக்களித்துவிட்டு, பின்னர் 'இது சரியாக இல்லை, அது சரியாக இல்லை' என்று கூறினால் என்ன செய்ய முடியும்? இன்று மக்கள் 'ரீல்ஸ்', 'போட்டோ ஷூட்' செய்பவர்களை நம்புகின்றனர். தங்கள் குழந்தைகள், பேரக் குழந்தைகள் சொன்னார்கள் என்று வாக்களித்துவிட்டு, இன்று அவர்கள் துணையாக வந்து நிற்பார்களா? நான் யாரையும் குறை சொல்லவில்லை. மக்களுக்கு இது புரிய வேண்டும் என்பதற்காகவே இதை கூறுகிறேன்' என்று வேதனையுடன் தெரிவித்தார்.
