மத்திய பிரதேசத்தின் இந்தூரில் நடைபெற்ற ஒரு நிகழ்ச்சியில், காங்கிரஸ் எம்.பி. ராகுல் காந்தி பங்கேற்றபோது, மேடையிலேயே பிரதமர் நரேந்திர மோடியை மிமிக்ரி நடிகர் கிண்டல் செய்தது பெரும் பரபரப்பை ஏற்படுத்தியுள்ளது. இந்த சம்பவத்திற்கு ராகுல் காந்தியின் எதிர்வினை என்ன என்பது குறித்த கேள்விகள் எழுந்துள்ளன.
நிகழ்ச்சியில் பேசிய ராகுல் காந்தி, பாஜக மற்றும் ஆர்எஸ்எஸ் அமைப்புகள் அரசு இயந்திரத்தை தங்கள் கட்டுப்பாட்டில் வைத்திருப்பதாக குற்றம் சாட்டினார். இதைத் தொடர்ந்து, மேடைக்கு அழைக்கப்பட்ட நகைச்சுவை நடிகர் புல்கிட் மணி, பிரதமர் மோடி பேசுவது போல் நடித்துக் காட்டினார். குறிப்பாக, வெளிநாட்டுத் தலைவர்களை பிரதமர் மோடி கட்டிப்பிடிப்பது மற்றும் அடிக்கடி 'மை ஃபிரண்ட்' என்று குறிப்பிடுவது போன்றவற்றை அவர் கிண்டலாக வெளிப்படுத்தினார்.
புல்கிட் மணி, 'எப்படி இருக்கிறீர்கள்?' என்று கேட்டதற்கு, ராகுல் காந்தி, 'நான் நன்றாக இருக்கிறேன், நீங்கள் எப்படி இருக்கிறீர்கள், மோடி ஜி?' என்று பதிலளித்தார். இது புல்கிட் மணியின் நடிப்பை ராகுல் காந்தி ரசிப்பதைக் காட்டியது.
முன்னதாக, பிரதமர் மோடியின் வெளிநாட்டுப் பயணங்களின்போது அவர் பிற நாட்டுத் தலைவர்களைக் கட்டிப்பிடிப்பதை விமர்சித்து புல்கிட் மணி இன்ஸ்டாகிராமில் வீடியோ வெளியிட்டிருந்தார். அந்த வீடியோக்கள் மார்ச் மாதம் முடக்கப்பட்ட நிலையில், அவர் இந்த நிகழ்ச்சியின் மூலம் மீண்டும் வெளிச்சத்திற்கு வந்துள்ளார்.
ராகுல் காந்தி, புல்கிட் மணியிடம் 'வேறு என்ன செய்ய வேண்டும்?' என்று கேட்டபோது, அவர், 'அந்த அம்மாவுக்கு ஒரு நாற்காலி கொண்டு வாருங்கள்' என்றார். இது, 2024 ஆம் ஆண்டு மேற்கு வங்கத்தின் ஹவுராவில் தேர்தல் பிரச்சாரத்தின்போது, மூதாட்டி ஒருவருக்கு நாற்காலி வழங்கக் கேட்டுக் கொண்ட சம்பவத்தை கேலி செய்யும் விதமாக அமைந்தது. இந்த செயல்களுக்கு காங்கிரஸ் மூத்த தலைவர் பவன் கேரா பாராட்டு தெரிவித்தார்.
இருப்பினும், பாஜக தலைவர்கள் இந்த சம்பவத்தை கடுமையாக விமர்சித்துள்ளனர். ராகுல் காந்தி ஒரு வயதான பெண்ணைக் கேலி செய்வதாக அவர்கள் குற்றம் சாட்டினர். பாஜக தனது எக்ஸ் தளத்தில், 'பிரதமர் மோடி ஒரு தாய்க்கு மரியாதை கொடுத்தார். ஆனால் ராகுல் காந்தி அவரை கேலி செய்தார். இதுதான் உண்மையான அரசியலுக்கும், காட்சி அரசியலுக்கும் உள்ள வித்தியாசம். ராகுல் காந்தியின் இந்த வெட்கக்கேடான செயல் அவருடைய மனநிலையை பிரதிபலிக்கிறதா?' என்று கேள்வி எழுப்பியுள்ளது.
பாஜக தேசிய செய்தித் தொடர்பாளர் சி.ஆர்.கேசவன், 'ராகுல் காந்தி நமது பெண்சக்தியை அவமதித்து, ஒரு வயதான பெண்ணை 'முன்கூட்டியே தயார் செய்து கொண்டு வரப்பட்டவர்' என்று கேலி செய்த நபருடன் மேடையைப் பகிர்ந்து கொண்டார். இதனால்தான், ராகுல் காந்தியும், காங்கிரஸ் கட்சியும் இளைஞர்களை ஈர்க்கத் தவறிவிட்டது என சசி தரூர் கூறியிருக்கிறார்' என்று குறிப்பிட்டுள்ளார்.
மேலும், பாஜக தலைவரும் மத்திய கல்வி அமைச்சருமான பிரகலாத் ஜோஷி, 'பிரதமர் மோடியை புல்கித் மணி கேலி செய்தது வெட்கக்கேடானது; அருவருப்பானது. ராகுல் காந்தியும் காங்கிரஸ் கட்சியும், பிரதமர் மோடியின் தாயாரைக் கேலி செய்ய மாணவர் கலந்துரையாடலை ஆயுதமாகப் பயன்படுத்தியது, அடிப்படை இரக்கமும் அரசியல் கலாச்சாரமும் இல்லாததை வெளிப்படுத்துகிறது. எதிர்க்கட்சித் தலைவர் பதவி என்பது பொறுப்புடன் வரக்கூடியது, இருப்பினும் ராகுல் காந்தி அந்தப் பதவியின் கண்ணியத்தைக் காப்பதில் தொடர்ந்து தவறி வருகிறார். இந்த துஷ்பிரயோக மனநிலையே பொதுமக்கள் காங்கிரஸை மீண்டும் மீண்டும் நிராகரித்ததற்குக் காரணம்' என்று தெரிவித்துள்ளார்.
இந்த சம்பவம், அரசியல் வட்டாரங்களில் பெரும் விவாதத்தை ஏற்படுத்தியுள்ளதுடன், ராகுல் காந்தியின் அரசியல் நிலைப்பாடு குறித்தும் கேள்விகளை எழுப்பியுள்ளது.
