குளறுபடிகளுக்கு இடமளிக்காமல், சாதிவாரி மக்கள் தொகைக் கணக்கெடுப்பை நடத்த வேண்டும் என்றும், இதர பிற்படுத்தப்பட்டோர் (OBC) மக்களின் உரிமைகளைக் காக்க சட்டப்பேரவையில் தீர்மானம் நிறைவேற்ற வேண்டும் என்றும் திமுக தலைவர் மு.க.ஸ்டாலின் வலியுறுத்தியுள்ளார்.
தற்போது நடைபெற்று வரும் மக்கள் தொகைக் கணக்கெடுப்பில், OBC பிரிவினரைக் கணக்கிடுவதற்கு, முன்கூட்டியே தீர்மானிக்கப்பட்ட பட்டியல் அல்லது தரப்படுத்தப்பட்ட மெனு இல்லாமல், சாதி விவரங்களைப் பதிவுசெய்யும் 'open-ended format' முறையை மத்திய அரசு பயன்படுத்தவுள்ளதாக வெளியாகியுள்ள அறிவிப்பு ஏமாற்றமளிப்பதாக ஸ்டாலின் தனது எக்ஸ் தளத்தில் குறிப்பிட்டுள்ளார்.
OBC பட்டியலில் இடம்பெறுபவை வகுப்புகளே தவிர, அவை சாதிகள் அல்ல என்று மத்திய அரசு தரப்பில் அளிக்கப்பட்ட விளக்கம் ஏற்புடையதல்ல என்றும் அவர் சுட்டிக்காட்டினார். ஒவ்வொரு மாநிலத்திலும் உள்ள பிற்படுத்தப்பட்டோர் மற்றும் மிகவும் பிற்படுத்தப்பட்டோர் பிரிவில் இடம்பெற்றுள்ள சாதிகளின் பட்டியலைப் பெற்று, தொகுத்து, பதிவேற்றி, அதில் இடம்பெற்றுள்ள சாதிகளில் ஒன்றைத் தேர்வு செய்யும் வாய்ப்பை மக்களுக்கு வழங்கினால் மட்டுமே குழப்பங்களைத் தவிர்க்க முடியும்.
மாறாக, பொதுமக்கள் கூறும் சாதியின் பெயரைப் பதிவு செய்வது குழப்பங்களுக்கு வழிவகுக்கும் என்றும், இதனால் இந்தியாவில் 46 லட்சம் சாதிகள் இருப்பதாகக் குளறுபடியான கணக்கு வரும் அபாயம் உள்ளதை அரசு புறக்கணிக்கக் கூடாது என்றும் அவர் எச்சரித்தார்.
சாதிவாரி மக்கள் தொகைக் கணக்கெடுப்பின் முக்கிய நோக்கமே, பட்டியலின மக்களின் எண்ணிக்கையைப் போலவே, OBC மக்களின் உண்மையான எண்ணிக்கையையும், அவர்களின் கல்வி, சமூக, பொருளாதார நிலைமையையும் அறிந்துகொள்வதுதான். இதன் மூலமே, அவர்கள் அதிகாரம் பெறுவதற்கான இடஒதுக்கீட்டுக் கொள்கைகளை வகுக்கவும், அவர்களின் முன்னேற்றத்திற்கான திட்டங்களைத் தீட்டவும் அரசுகளால் இயலும்.
எனவே, மத்திய மற்றும் மாநில அரசுகளின் OBC சாதிகளின் பட்டியலை அடிப்படையாகக் கொண்டு, மக்கள் தங்கள் சாதிப்பெயரைத் தேர்வு செய்யும் முறையைப் பின்பற்றினால்தான் சாதிவாரிக் கணக்கெடுப்பின் நோக்கம் நிறைவேறும் என்று ஸ்டாலின் விளக்கினார்.
தற்போதைய முறையைத் தொடர்ந்தால், மக்கள் தொகைக் கணக்கெடுப்புக்காகச் செலவிடப்படும் சுமார் 12 ஆயிரம் கோடி ரூபாய் மற்றும் இலட்சக்கணக்கான அரசு ஊழியர்களின் உழைப்பு வீணடிக்கப்படும். இது வெறும் கண்துடைப்பு நடவடிக்கையாக அமைந்துவிடும் அபாயம் உள்ளது.
எனவே, பொருத்தமற்ற விளக்கங்களைக் கூறி தவறுகளை நியாயப்படுத்தாமல், குளறுபடிகளுக்கு இடமளிக்காமல், சாதிவாரிக் கணக்கெடுப்பின் உண்மையான நோக்கம் நிறைவேறும் வகையில் திருத்த நடவடிக்கைகளை உடனடியாக மத்திய அரசு மேற்கொள்ள வேண்டும் என்று அவர் வலியுறுத்தினார். கோடானுகோடி பிற்படுத்தப்பட்ட மற்றும் மிகவும் பிற்படுத்தப்பட்ட மக்களின் சமூகநீதி உரிமையை உறுதிசெய்ய வேண்டும் என்றும் திராவிட முன்னேற்றக் கழகத்தின் சார்பில் கேட்டுக்கொண்டார்.
மேலும், தமிழ்நாடு அரசும் தமிழ்நாட்டு மக்களின் உணர்வுகளைப் பிரதிபலிக்கும் வகையில், நடப்பு சட்டமன்றக் கூட்டத் தொடரிலேயே இதற்கான சிறப்புத் தீர்மானத்தை நிறைவேற்றி, மத்திய அரசுக்கு உரிய அழுத்தத்தை வழங்க வேண்டும் என்றும் ஸ்டாலின் கேட்டுக்கொண்டார்.
