பெட்ரோல், டீசல் விலைகள் மீண்டும் உயர்த்தப்பட்டுள்ளதால் வாகன ஓட்டிகள் கடும் அதிர்ச்சியில் ஆழ்ந்துள்ளனர். ஒரு லிட்டர் பெட்ரோல் விலை 2 ரூபாய் 46 பைசாவும், டீசல் விலை 2 ரூபாய் 57 பைசாவும் உயர்ந்துள்ளது. இது கடந்த இரண்டு வாரங்களில் நான்காவது முறையாகும்.
தற்போதைய நிலவரப்படி, சென்னையில் ஒரு லிட்டர் பெட்ரோலின் விலை 107 ரூபாய் 77 காசுகளாகவும், டீசல் விலை 99 ரூபாய் 55 காசுகளாகவும் விற்பனையாகிறது. மத்திய கிழக்கில் நிலவும் போர் பதற்றம் காரணமாக சர்வதேச சந்தையில் கச்சா எண்ணெய் விலை பீப்பாய்க்கு 105 டாலர்களைக் கடந்து உயர்ந்துள்ளது.
ஹார்முஸ் ஜலசந்தியில் போக்குவரத்து பாதிக்கப்பட்டுள்ளதால் கச்சா எண்ணெய் விநியோகம் கடுமையாக பாதிக்கப்பட்டுள்ளது. இதன் விளைவாக, உலகளவில் எண்ணெய் விலைகள் உயர்ந்துள்ளன. இந்திய எண்ணெய் நிறுவனங்கள் இந்த விலை உயர்வால் பெரும் நஷ்டத்தை சந்தித்து வந்தன. இந்த இழப்பை ஈடுகட்டும் வகையிலேயே தற்போது விலை உயர்த்தப்பட்டுள்ளதாக மத்திய அரசு வட்டாரங்கள் தெரிவிக்கின்றன.
பெட்ரோல், டீசல் விலை உயர்வின் தாக்கம் சரக்கு போக்குவரத்து மீதும் எதிரொலிக்கும் என எதிர்பார்க்கப்படுகிறது. லாரி உள்ளிட்ட சரக்கு வாகனங்களின் கட்டணம் சுமார் 3 சதவீதம் வரை உயரக்கூடும். இதனால், அத்தியாவசியப் பொருட்களின் விலையும் உயரும் அபாயம் ஏற்பட்டுள்ளது. இது குறித்து மக்கள் மத்தியில் அச்சம் நிலவுகிறது.
