பெரம்பலூர் காமராஜர் வளைவு அருகே அருணாசலம் என்பவருக்குச் சொந்தமான டீக்கடையில் கடந்த ஆகஸ்ட் 11-ஆம் தேதி அன்று கேஸ் சிலிண்டர் கசிவு ஏற்பட்டு பெரும் தீ விபத்து ஏற்பட்டது. இந்த துயர சம்பவத்தில், சிலிண்டர் வெடித்து சிதறியதில் சுமார் 10 மீட்டர் தூரம் வரை தீ பரவியது. இந்த தீ விபத்தால் அப்பகுதியில் இருந்த பலர் படுகாயமடைந்தனர். ஆரம்பத்தில், இந்த விபத்தில் 5 பேர் உயிரிழந்ததாக முதற்கட்ட தகவல்கள் தெரிவித்தன. இந்நிலையில், இன்று காலை 9 மணி அளவில் திருச்சி தனியார் மருத்துவமனையில் சிகிச்சை பெற்று வந்த பெரம்பலூர் மாவட்டம் களரம்பட்டியைச் சேர்ந்த விஜயகுமார் (வயது 47) என்பவர் சிகிச்சை பலனின்றி பரிதாபமாக உயிரிழந்தார். இதனால், பெரம்பலூர் பழைய பேருந்து நிலையம் அருகே இருந்த அந்த டீக்கடையில் ஏற்பட்ட தீ விபத்தில் சிக்கி உயிரிழந்தவர்களின் மொத்த எண்ணிக்கை தற்போது 6 ஆக உயர்ந்துள்ளது. இந்த சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.
