பாகிஸ்தான் பிரதமர் ஷெபாஸ் ஷெரீப், நான்கு நாட்கள் அரசு முறைப் பயணமாக நேற்று சீனா சென்றடைந்தார். இந்த பயணத்தின் முக்கிய நோக்கம், சீனாவுடனான உறவை மேலும் வலுப்படுத்துவதும், இரு நாடுகளுக்கிடையேயான தூதரக உறவுகளின் 75வது ஆண்டு விழாவில் பங்கேற்பதும் ஆகும்.
தனது பயணத்தின் முதல் கட்டமாக, ஷெபாஸ் ஷெரீப் சீனாவின் ஹாங்சோ நகரை அடைந்தார். அங்கு, சீன கம்யூனிஸ்ட் கட்சியின் ஜெஜியாங் மாகாண செயலாளரை அவர் சந்திக்கிறார். மேலும், சீனா-பாகிஸ்தான் பொருளாதார வழித்தடத்தின் (சிபெக்) இரண்டாம் கட்டத்தின் கீழ், இரு நாட்டு நிறுவனங்களுக்கு இடையிலான ஒத்துழைப்பை மேம்படுத்துவதற்காக நடத்தப்படும் வணிக மன்றக் கூட்டத்திலும் அவர் பங்கேற்கிறார். முக்கிய சீன நிறுவனங்களின் தலைமை நிர்வாக அதிகாரிகளையும் ஷெரீப் சந்திக்க உள்ளார்.
இதனைத் தொடர்ந்து, ஷெபாஸ் ஷெரீப் பெய்ஜிங் நகருக்குச் செல்கிறார். அங்கு, சீன அதிபர் ஜி ஜின்பிங் மற்றும் பிரதமர் லீ கியாங் ஆகியோரை சந்தித்து முக்கிய பேச்சுவார்த்தைகளை நடத்த உள்ளார். பாகிஸ்தான்-சீனா தூதரக உறவுகளின் 75வது ஆண்டு நிறைவு விழாவிலும் அவர் பங்கேற்கிறார். மேலும், சீனாவின் முக்கிய நிறுவனங்களின் தலைவர்களுடனும் அவர் ஆலோசனை நடத்த உள்ளார். சீன வேளாண் அறிவியல் அகாடமிக்கும் அவர் நேரில் செல்ல திட்டமிட்டுள்ளார்.
பிரதமர் ஷெபாஸ் ஷெரீப்பின் இந்தப் பயணம், பாகிஸ்தான்-சீனா உறவுகளில் ஒரு புதிய பரிமாணத்தை ஏற்படுத்தும் என எதிர்பார்க்கப்படுகிறது. இரு நாடுகளுக்கிடையேயான பொருளாதார மற்றும் தூதரக உறவுகளை மேலும் வலுப்படுத்தும் வகையில் இந்தப் பயணம் அமையும் என அறிவிக்கப்பட்டுள்ளது.
