வங்கதேசத்திற்கு எதிரான டெஸ்ட் தொடரில் 0-2 என பாகிஸ்தான் அணி தோல்வியடைந்ததை அடுத்து, தலைமைப் பயிற்சியாளர் சர்ஃபராஸ் அகமது மற்றும் கேப்டன் ஷான் மசூத் ஆகியோரை பதவியில் இருந்து நீக்குவது குறித்து பாகிஸ்தான் கிரிக்கெட் வாரிய (பிசிபி) தலைவர் மோசின் நக்வி தீவிர ஆலோசனையில் ஈடுபட்டுள்ளார். இது பாகிஸ்தான் கிரிக்கெட்டில் வழக்கமாக நடக்கும் அதிகார மாற்றங்களின் தொடர்ச்சியாகப் பார்க்கப்படுகிறது.
கடந்த 2026 ஆம் ஆண்டு தொடக்கத்தில், பாகிஸ்தான் 19 வயதுக்குட்பட்டோருக்கான அணியை வழிநடத்தி ஆசியக் கோப்பை இறுதிப்போட்டியில் இந்தியாவை வீழ்த்தியதன் மூலம் மூத்த அணியின் தலைமைப் பயிற்சியாளராக சர்ஃபராஸ் அகமது நியமிக்கப்பட்டார். 2017 சாம்பியன்ஸ் டிராபி இறுதிப் போட்டியில் இந்தியாவை வீழ்த்திய அணியின் கேப்டனாக இருந்ததும் அவரது நியமனத்திற்கு ஒரு முக்கிய காரணமாக அமைந்தது. ஆனால், வங்கதேச தொடரில் ஏற்பட்ட தோல்வியால் அவரை உடனடியாகப் பதவியில் இருந்து நீக்க பிசிபி முடிவு செய்துள்ளது.
பாகிஸ்தான் கிரிக்கெட்டில், ஒரு பயிற்சியாளர் நியமிக்கப்பட்ட உடனேயே அடுத்த பயிற்சியாளரைத் தேடும் போக்கு காணப்படுகிறது. கடந்த 3 முதல் 4 ஆண்டுகளில், கேப்டன்கள் மற்றும் பயிற்சியாளர்களின் எண்ணிக்கையை விட, அவர்கள் வென்ற போட்டிகளின் எண்ணிக்கை குறைவு என ரசிகர்கள் கிண்டலடித்து வருகின்றனர். கேரி கிர்ஸ்டன், ஜேசன் கில்லஸ்பி போன்ற தலைசிறந்த வீரர்களையும் பயிற்சியாளர்களையும் கூட பாகிஸ்தான் கிரிக்கெட் வாரியம் கையாண்ட விதம் விமர்சனத்துக்குள்ளாகியுள்ளது.
ஒரு தொடரில் தோற்றால் கேப்டன் பதவி பறிபோகும், அடுத்த தொடரில் தோற்றால் பயிற்சியாளர் பதவி பறிபோகும் என்பதே பிசிபி-யின் எழுதப்படாத விதியாக உள்ளது. தற்போது கேப்டன் ஷான் மசூத்தின் பதவியும் ஆபத்தில் உள்ளது. அவருக்குப் பதிலாக ஆல்-ரவுண்டர் சல்மான் அலி ஆகா கேப்டனாக நியமிக்கப்பட வாய்ப்புள்ளதாகத் தகவல்கள் தெரிவிக்கின்றன. மேலும், புதிய பயிற்சியாளராக முன்னாள் கேப்டன் யூனிஸ் கானிடமும், புதிய தலைமைத் தேர்வாளராக முகமது ஹஃபீஸிடமும் பிசிபி பேச்சுவார்த்தை நடத்தி வருகிறது. தொலைக்காட்சிகளிலும் ஊடகங்களிலும் பிசிபி-யை விமர்சித்து வரும் முகமது ஹஃபீஸை அமைதிப்படுத்தவே அவருக்குப் புதிய பதவி வழங்க பிசிபி திட்டமிட்டுள்ளதாக செய்திகள் கசிந்துள்ளன. பதவி பறிக்கப்படும் சர்ஃபராஸ் மீண்டும் யு19 மற்றும் பாகிஸ்தான் ஏ அணிகளின் பயிற்சியாளராக மாற்றப்பட உள்ளதாகவும் கூறப்படுகிறது. பாகிஸ்தான் கிரிக்கெட்டின் இந்த அதிரடி மாற்றங்கள், அடுத்து வரும் தொடர்களுக்குள் மேலும் எத்தனை திருப்பங்களைச் சந்திக்கப் போகிறது என்பதைப் பொறுத்திருந்துதான் பார்க்க வேண்டும்.
