இமயமலை பனிப்பாறை உருகி ஆற்றில் விழுந்தது: நேபாளத்தில் பெரும் வெள்ளம்

இமயமலையில் உள்ள பனிப்பாறை உருகி லெண்டே ஆற்றில் விழுந்ததால் நேபாளத்தில் கடுமையான வெள்ளப்பெருக்கு ஏற்பட்டுள்ளதாக அந்நாட்டு அரசு அதிகாரப்பூர்வமாக அறிவித்துள்ளது.

நேபாளத்தின் வடக்குப் பகுதி இன்று காலை திடீர் வெள்ளத்தால் கடுமையாக பாதிக்கப்பட்டது. இந்த வெள்ளப்பெருக்குக்கு இமயமலையில் உள்ள பனிப்பாறை உருகி லெண்டே ஆற்றில் விழுந்ததே காரணம் என நேபாள அரசு உறுதிப்படுத்தியுள்ளது.

நேபாளம்-சீனா இடையிலான ரசுவாகதி எல்லையின் வடகிழக்கே சுமார் 20 கிலோமீட்டர் தொலைவில் இந்த துயரம் நிகழ்ந்துள்ளது. அங்கு பனிப்பாறை சரிந்து லெண்டே ஆற்றில் விழுந்ததாக தெரிவிக்கப்பட்டுள்ளது.

மேலும், திபெத் பகுதியில் இன்று காலை ஏற்பட்ட 4.4 ரிக்டர் அளவிலான நிலநடுக்கம் காரணமாக ஏற்பட்ட நிலச்சரிவு மற்றும் பாறைகள் சரிந்ததால் ஆற்றுப்பாதை அடைபட்டதாகவும், இதனால் அணை உடைப்பெடுத்து பெருவெள்ளமாக மாறியதாகவும் நேபாள வெளியுறவுத்துறை அமைச்சர் சிசர் கனால் விளக்கமளித்துள்ளார்.

இந்த துயர சம்பவத்தில் இதுவரை 55 உடல்கள் மீட்கப்பட்டுள்ளதாகவும், சுமார் 400 பேர் வரை மாயமாகியிருப்பதாகவும் நேபாள அரசு அதிகாரப்பூர்வ அறிவிப்பை வெளியிட்டுள்ளது.

இதற்கிடையில், நேபாள எல்லையை ஒட்டிய திபெத் நகர் ஒன்றில் 'சேற்றுச்சரிவு' ஏற்பட்டதைத் தொடர்ந்து, மீட்புப் பணிகளை மேற்கொள்ளுமாறு சீன அதிபர் உத்தரவிட்டுள்ளதாக சீன ஊடகங்கள் செய்தி வெளியிட்டுள்ளன. பாதிப்புக்குள்ளாகும் அபாயத்தில் உள்ள மக்களை உடனடியாக வெளியேற்றுவதற்கான நடவடிக்கைகளை மேற்கொள்ளுமாறும் அதிபர் வலியுறுத்தியுள்ளார்.

இந்த திடீர் வெள்ளப்பெருக்கு காரணமாக அப்பகுதியில் பெரும் சேதம் ஏற்பட்டுள்ளதுடன், உயிரிழப்புகளும் அதிகரித்துள்ளன. மீட்புப் பணிகள் தொடர்ந்து நடைபெற்று வருகின்றன.

Author

Fernandez

Senior Reporter

Fernandaz – MDTV 24x7 News நிறுவனத்தின் Senior Reporter மற்றும் General News Writer ஆக பணியாற்றி வருகிறார். அரசியல், சமூக நிகழ்வுகள், மக்கள் பிரச்சினைகள் மற்றும் முக்கிய நடப்பு செய்திகளை துல்லியமாகவும் விரைவாகவும் மக்களிடம் கொண்டு சேர்ப்பதில் அனுபவம் பெற்றவர். நம்பகமான தகவல்களை தரமான செய்திகளாக வழங்கும் நோக்கத்துடன் செய்தித்துறையில் தொடர்ந்து செயல்பட்டு வருகிறார்.