தமிழக பாஜக தலைவர் நயினார் நாகேந்திரன் நெல்லையில் செய்தியாளர்களைச் சந்தித்தார். அப்போது அவர் கூறுகையில், "தற்போதைய சூழலில் இரண்டு சட்டமன்ற தொகுதிகளுக்கு இடைத்தேர்தல் நடைபெற உள்ளது. மேலும், நான்கு இடைத்தேர்தல்கள் வரவிருக்கின்றன. சட்டமன்றத் தேர்தல் நடந்து சில மாதங்களிலேயே மீண்டும் இடைத்தேர்தல்கள் வருகின்றன என்றால், அதற்கு முக்கியக் காரணம் குதிரை பேரம்தான். இந்த குதிரை பேரங்கள் எதற்காக நடைபெறுகின்றன என்பது அனைவருக்கும் தெரியும்" எனத் தெரிவித்தார்.
தொடர்ந்து பேசிய அவர், "தமிழக முதலமைச்சர் லண்டன் சென்றுள்ளார். அவர் சொந்த வேலைக்காக சென்றிருக்கிறாரா அல்லது முதலீட்டாளர்களை ஈர்ப்பதற்காக சென்றிருக்கிறாரா என்பது குறித்து பல தகவல்கள் பரவி வருகின்றன. அவருடன் யார் யாரெல்லாம் அரசு செலவில் அழைத்துச் செல்லப்பட்டார்கள் என்பது எங்களுக்குத் தெரியாது. அவர் லண்டனில் இந்த மூன்று, நான்கு நாட்களில் எத்தனை பேரை சந்திக்க முடியும் என்பது ஒரு கேள்விக்குறிதான். லண்டனில் இருந்து திரும்பிய பிறகு அவர் இது குறித்து விளக்கம் அளிக்க வேண்டும்.
முதலீட்டாளர்களை ஈர்ப்பதற்காகவே சென்றிருக்கிறார் என்றால், அவர் யாரையெல்லாம் சந்தித்தார், எவ்வளவு கோடி முதலீடுகள் வந்துள்ளன என்பது போன்ற விவரங்களை அவர் தமிழகம் திரும்பியதும் அறிவிக்க வேண்டும். அவர் சொந்த வேலைக்காக சென்றிருந்தால், அதுகுறித்து நாங்கள் எதுவும் கூற முடியாது" என்று நயினார் நாகேந்திரன் கூறினார்.
