ஞாயிற்றுக்கிழமை என்றாலே பலருக்கும் மட்டன் பிரியாணி அல்லது மட்டன் குழம்பு என நினைவுக்கு வரும். அப்படி மட்டன் வாங்கச் செல்லும் முன், அதன் நன்மைகள் குறித்து தெரிந்து கொள்வது அவசியம். ஆட்டிறைச்சி சாப்பிடுவதால் உடலுக்கு பல நன்மைகள் கிடைப்பதாக ஆய்வுகள் தெரிவிக்கின்றன.
வேகவைத்த அல்லது கிரில் செய்யப்பட்ட மட்டனை உணவாக உட்கொள்ளும்போது, அது உடலுக்கு மிகுந்த வலுவை அளிப்பதாகக் கூறப்படுகிறது. மேலும், ஆட்டுக்கறியானது உடல் சூட்டைக் குறைக்கும் தன்மையையும் கொண்டிருப்பதாக அறியப்படுகிறது. தொடர்ந்து ஆட்டிறைச்சியை உணவில் சேர்த்துக்கொள்பவர்களுக்கு சருமப் பிரச்சனைகள் ஏற்படுவது குறைவதாகவும், சருமப் பொலிவு அதிகரிப்பதுடன், பார்வைக் கோளாறுகளும் நீங்குவதாகவும் தெரிவிக்கப்பட்டுள்ளது.
ஆட்டிறைச்சியில் வைட்டமின் பி12, நியாசின், இரும்புச்சத்து மற்றும் செலினியம் போன்ற அத்தியாவசிய சத்துக்கள் நிறைந்துள்ளன. இதில் உள்ள வைட்டமின் பி12, நரம்புகளையும் இரத்த அணுக்களையும் ஆரோக்கியமாகப் பராமரிக்க உதவுகிறது. செலினியம், நோயெதிர்ப்பு மண்டலத்தின் செயல்பாட்டைத் தூண்டுவதுடன், வளர்சிதை மாற்றம் மற்றும் தைராய்டு செயல்பாட்டிற்கும் துணைபுரிகிறது. நியாசின், நாம் உண்ணும் உணவை ஆற்றலாக மாற்றுவதில் முக்கியப் பங்கு வகிக்கிறது.
மற்ற இறைச்சி வகைகளுடன் ஒப்பிடுகையில், ஆட்டிறைச்சியில் இரும்புச்சத்து அதிகமாக உள்ளது. உதாரணமாக, 100 கிராம் சிக்கனில் வெறும் 1.7 மி.கி இரும்புச்சத்து மட்டுமே இருக்கும் நிலையில், 100 கிராம் இளம் ஆட்டிறைச்சியில் சுமார் 3.8 மி.கி இரும்புச்சத்து காணப்படுகிறது. இதனால், ரத்த சோகையால் பாதிக்கப்பட்டவர்களுக்கு ஆட்டிறைச்சி மிகவும் நன்மை பயக்கும் என்றும், ரத்த சோகை வராமல் தடுக்கவும் இது உதவுவதாகவும் கூறப்படுகிறது.
ஹார்வர்டு பல்கலைக்கழகம் நடத்திய ஓர் ஆய்வின்படி, நிறைவுற்ற கொழுப்பு இதய நோய் அபாயத்தை அதிகரிக்கக்கூடும். ஆனால், நிறைவுறா கொழுப்புகள் (Unsaturated Fats) உடலில் நல்ல கொழுப்பின் அளவை அதிகரிக்கச் செய்கின்றன. ஆட்டிறைச்சியில் இந்த நிறைவுறா கொழுப்புகள் அபரிமிதமாக நிறைந்துள்ளதால், இதனை உட்கொள்வது இதய ஆரோக்கியத்திற்கு நன்மை பயக்கும் என்று அந்த ஆய்வு சுட்டிக்காட்டுகிறது.
மேலும், நமது உடலுக்குத் தேவையான வைட்டமின் பி12-ல் கிட்டத்தட்ட 32 சதவீதத்தை ஆட்டிறைச்சி வழங்குவதாகக் கூறப்படுகிறது. இரத்த சிவப்பணுக்களை உற்பத்தி செய்வதற்கு இந்த ஊட்டச்சத்து மிகவும் அவசியமானதாகும். எனவே, ஞாயிற்றுக்கிழமைகளில் மட்டன் உண்பது உடலுக்கு ஆரோக்கியம் தருவதாக அமைந்துள்ளது.
