இந்திய இளைஞர்களின் வாழ்வாதாரத்தை மத்திய அரசு சீர்குலைத்துவிட்டதாக காங்கிரஸ் கமிட்டியின் மாநிலத் தலைவர் மாணிக்கம்தாகூர் கடுமையாக விமர்சித்துள்ளார். குறிப்பாக, பிரதமர் மோடி தலைமையிலான அரசு, வேலைவாய்ப்பு குறித்த வெற்று வாக்குறுதிகளை மட்டுமே வழங்கி, 12 ஆண்டுகளில் 24 கோடி பேருக்கு வேலை வழங்கியிருக்க வேண்டும் என்ற நிலையில், தற்போது 45 ஆண்டுகளில் இல்லாத அளவுக்கு வேலையில்லா திண்டாட்டம் நாட்டில் தலைவிரித்தாடுவதாக அவர் குற்றஞ்சாட்டியுள்ளார்.
மாணிக்கம்தாகூர் வெளியிட்டுள்ள அறிக்கையில், 2014 முதல் ஆட்சியில் இருக்கும் மோடி அரசு, ஆண்டுதோறும் 2 கோடி பேருக்கு வேலைவாய்ப்பு அளிப்பதாக இளைஞர்களிடம் கூறிய வாக்குறுதிகளை நிறைவேற்றத் தவறிவிட்டதாகக் குறிப்பிட்டுள்ளார். இந்த 12 ஆண்டுகளில் 24 கோடி பேருக்கு வேலை வழங்கியிருக்க வேண்டும் என்றும், ஆனால் அதற்கு மாறாக நாட்டில் வரலாறு காணாத வேலையில்லா திண்டாட்டம் நிலவுவதாகவும் அவர் வேதனை தெரிவித்துள்ளார்.
நிதி ஆயோக் ஆகஸ்ட் 2026 இல் வெளியிட்ட அறிக்கையின்படி, 15 முதல் 29 வயதுக்குட்பட்ட 8.7 கோடி இளைஞர்கள் கல்வி, வேலைவாய்ப்பு அல்லது தொழிற்பயிற்சி எதுவுமின்றி முடங்கிக் கிடப்பதாகவும், மேலும் 79.6 கோடி பேர் உழைக்கும் சந்தைக்கு வெளியே தள்ளப்பட்டுள்ளதாகவும் அதிகாரப்பூர்வமாக அம்பலமாகியுள்ளது. படித்த பட்டதாரிகளில் வெறும் 8.25 சதவிகிதத்தினருக்கு மட்டுமே தகுதிக்கு ஏற்ற வேலை கிடைத்துள்ளதாகவும், பட்டம் பெற்ற பெண்களிடையே 20.4 சதவிகித வேலையின்மை நிலவுவதாகவும் அவர் சுட்டிக்காட்டியுள்ளார். இது மோடி அரசின் விளம்பர அரசியலின் உண்மை முகத்தை வெளிச்சம் போட்டுக் காட்டுவதாகவும் அவர் தெரிவித்துள்ளார்.
ஒருபுறம் மருத்துவக் கனவைச் சிதைக்கும் நீட் தேர்வு, மறுபுறம் இளைஞர்களை வேலைக்கே செல்லவிடாமல் முடக்கும் சமூக-பொருளாதார நெருக்கடி என இரட்டைத் தாக்குதலுக்கு ஆளாகியிருப்பதாக மாணிக்கம்தாகூர் குறிப்பிட்டுள்ளார். தற்போது மத்திய புள்ளியியல் அமைச்சகம் செப்டம்பர் 2026 இல் வெளியிட்ட மாவட்ட அளவிலான காலமுறை தொழிலாளர் படை கணக்கெடுப்பு அறிக்கை, இந்த அவல நிலையை உள்ளூர் அளவில் மேலும் உறுதிப்படுத்தியுள்ளது.
நாடு முழுவதும் 250-க்கும் மேற்பட்ட மாவட்டங்களில் 25 சதவிகிதத்திற்கும் அதிகமான இளைஞர்கள் கல்வி அல்லது வேலையின்றி முடங்கிக் கிடப்பதாகவும், கிட்டத்தட்ட 23.7 சதவிகித பகுதிகளில் 30 சதவிகிதத்திற்கும் அதிகமான இளைஞர்கள் எவ்வித வேலை வாய்ப்பின்றி எதிர்காலம் கேள்விக்குறியாக்கப்பட்டுள்ளதாகவும் அந்த அறிக்கை கூறுவதாக மாணிக்கம்தாகூர் தெரிவித்துள்ளார்.
மோடி அரசின் இந்த நிர்வாகத் தோல்வியும் புறக்கணிப்பும் தமிழ்நாட்டிலும் கடுமையான தாக்கத்தை ஏற்படுத்தியுள்ளன. தென் தமிழ்நாட்டின் முக்கிய நகரமான மதுரையில் வேலையின்மை விகிதம் 7.0 சதவிகிதமாக உயர்ந்துள்ளது. திருவள்ளூர், திருவாரூர், மதுரை, சென்னை போன்ற மாவட்டங்களில் முறையே 24.9%, 23.9%, 23.8%, 22.4% என இளைஞர்கள் வேலைவாய்ப்பின்றி வாழ்வாதாரத்தை இழந்து தவிப்பதாக அவர் குறிப்பிட்டுள்ளார். கிராமப்புறத் தமிழ்நாட்டில் நிலையான ஊதிய வேலைகள் கிடைக்காமல், 30.4% குடும்பங்கள் முறைசாரா தினக்கூலி வேலைகளை நம்பியிருக்க வேண்டிய கட்டாயத்தில் உள்ளதாகவும் அவர் தெரிவித்துள்ளார்.
இளைஞர்களுக்குத் தொழிற்பயிற்சி வழங்குவதாகக் கூறி புதிய கல்விக் கொள்கையைத் திணிக்கும் மத்திய அரசு, களத்தில் அவர்களுக்குக் கண்ணியமான வேலைவாய்ப்புகளை உருவாக்கத் தவறிவிட்டதாக மாணிக்கம்தாகூர் குற்றம்சாட்டியுள்ளார். தேசிய அளவில் 8.7 கோடி இளைஞர்களின் வாழ்வைச் சூறையாடியதோடு, மாவட்ட வாரியாகப் பல கோடி இளைஞர்களின் உழைப்பையும் ஆற்றலையும் வீணடித்து நடுத்தெருவில் நிறுத்தியுள்ள மோடி அரசின் பொருளாதாரத் துரோகங்களுக்கு, தங்களின் எதிர்காலத்தை இழந்து தவிக்கும் இந்த இளைய தலைமுறை ஒருபோதும் துணை நிற்காது என்றும், மோடி அரசில் நிலவும் வேலையில்லா திண்டாட்டத்திற்கு உரிய பாடத்தை இந்திய இளைஞர்கள் நிச்சயம் புகட்டுவார்கள் என்றும் அவர் தனது அறிக்கையில் குறிப்பிட்டுள்ளார்.
