புதிய தமிழக அரசு அமைந்திருக்கும் சூழலில், அதிமுக எம்எல்ஏக்கள் தங்கள் சொந்த விருப்பத்தின் பேரிலேயே ராஜினாமா செய்துள்ளதாக அமைச்சர் செங்கோட்டையன் தெரிவித்துள்ளார். அதிமுக எம்எல்ஏக்களை தான் தவெகவில் சேர்த்ததாக கூறப்படும் குற்றச்சாட்டுகளை அவர் மறுத்துள்ளார். முதல்வர் விஜய்யின் ஆட்சியின் செயல்பாடுகளைப் பார்த்து பலரும் அவருடன் இணைந்துள்ளதாக அவர் குறிப்பிட்டுள்ளார்.
சென்னை தலைமைச் செயலகத்தில் செய்தியாளர்களை சந்தித்த அமைச்சர் செங்கோட்டையன், 'பணநாயகத்தை வென்று ஜனநாயகத்தைக் காக்கும் முதல்வர் விஜய்யின் ஆட்சியின் செயல்பாடுகளைப் பார்த்து எல்லோரும் இன்று அவருடன் இணைந்துள்ளனர்' என்று கூறினார். ராஜினாமா செய்தவர்களுக்கு அதே தொகுதியில் மீண்டும் தவெக சார்பில் போட்டியிட வாய்ப்பு வழங்கப்படுமா என்பது குறித்து பின்னர் தெரியவரும் என்றும் அவர் தெரிவித்தார்.
'எங்கள் ஆட்சியில் யாரும் குதிரை பேரம் நடத்தவில்லை. குதிரை பேரம் நடத்தியது யார் என்பது நாட்டுக்கே தெரியும். திமுக ஆதரவோடு நான் முதல்வர் ஆவேன் என்று சொன்னது யார் என்பதை தெரிந்துகொண்டு அவரிடம் இதற்கான பதிலை கேளுங்கள்' என்றும் அவர் சவால் விடுத்தார். மேலும், அதிமுகவில் இருந்த எம்எல்ஏக்கள் தங்கள் விருப்பத்தின் பேரிலேயே ராஜினாமா செய்துள்ளதாகவும், புதிய ஆட்சி வந்துள்ளதால் மாற்றங்கள் செய்ய வேண்டியுள்ளது என்றும் அவர் விளக்கினார்.
'புதிய ஆட்சி வந்துள்ளது, மாற்றங்கள் செய்ய வேண்டியுள்ளது. எனவே ஆறு மாத காலம் பொறுத்திருந்தே விமர்சிப்போம் என எதிர்க்கட்சியான திமுக சொன்னதா இல்லையா? நாங்களும் பொறுத்திருந்தே ஒவ்வொன்றாக செய்ய முடியும். எங்களுக்கும் அவகாசம் கொடுக்க வேண்டும். குற்றங்கள் நடக்கும்போது உடனுக்குடன் நடவடிக்கை எடுக்கப்பட்டுள்ளது. கோவை சிறுமி விவகாரத்தில் குற்றவாளி உடனடியாக கைது செய்யப்பட்டுள்ளார். இதில் காவல் துறை கடுமையான நடவடிக்கை எடுக்கும்' என்றும் அவர் தெரிவித்தார்.
'அதிமுக எம்எல்ஏக்களை நான் அழைத்து வந்து தவெகவில் சேர்ப்பதாக சொல்லும் குற்றச்சாட்டு தவறானது. நான் யாரையாவது அழைத்து வந்து சேர்த்தேனா? பழனிசாமி என் மீது கோபத்தில் இருக்கிறார், அதனால் இதுபோல குற்றம்சாட்டுகிறார். ஜெயலலிதா, எம்ஜிஆர் படங்கள் தேவையில்லை, தன் படம் போதும் என பழனிசாமி நினைத்தார்' என்றும் அவர் கடுமையாக விமர்சித்தார்.
