மதுரை அரசு சட்டக்கல்லூரியில் நடைபெற்ற மாணவர்களுக்கான பட்டமளிப்பு விழாவில், தமிழக மின்சாரத்துறை அமைச்சர் நிர்மல்குமார் முக்கிய விருந்தினராகக் கலந்துகொண்டார். இந்த நிகழ்ச்சியின்போது, உயர்நீதிமன்ற நீதிபதி ஏடி.ஜெகதீஷ்சந்திரா பேசிக்கொண்டிருந்தபோது திடீரென மின்தடை ஏற்பட்டது. இதனால் அரங்கம் முழுவதும் இருளில் மூழ்கி, சில நிமிடங்கள் பரபரப்பு நிலவியது. எனினும், சில நிமிடங்களிலேயே மின்சாரம் மீண்டும் வந்ததால், நிகழ்ச்சி தொடர்ந்து நடைபெற்றது.
இந்தச் சம்பவம், தமிழகத்தில் மின் பற்றாக்குறை இல்லை என அமைச்சர் நிர்மல்குமார் தொடர்ந்து கூறிவரும் நிலையில், அவர் பங்கேற்ற நிகழ்ச்சியிலேயே மின் தடை ஏற்பட்டிருப்பது குறித்து பட்டமளிப்பு விழாவில் பங்கேற்ற மாணவ, மாணவிகள் மத்தியில் சலசலப்பை ஏற்படுத்தியது. இதுகுறித்து அவர்கள் முணுமுணுத்துக் கொண்டனர்.
முன்னதாக, இடைத்தேர்தல் நடைபெறும் தாராபுரம் மற்றும் மதுராந்தகம் தொகுதிகளிலும் மின்வெட்டு ஏற்பட்ட சம்பவம், தவெகவினர் மத்தியில் தர்மசங்கடத்தை ஏற்படுத்தியிருந்தது. கடந்த இரண்டு நாட்களுக்கு முன்பு அச்சிறுப்பாக்கத்தில் நடைபெற்ற தவெக முகவர்கள் கூட்டத்தில், ஆதவ் அர்ஜுனா பேசிக்கொண்டிருந்தபோது திடீரென மின்வெட்டு ஏற்பட்டது. இதனால் அவர் அப்செட் ஆகி, ஜெனரேட்டரை ஆன் செய்யும்படி கூறினார். சிறிது நேரத்தில் மின்சாரம் மீண்டும் வந்தது.
இதேபோல், தாராபுரத்தில் அமைச்சர் செங்கோட்டையன் உள்ளிட்ட அமைச்சர்கள் பலர் கலந்துகொண்ட நிகழ்ச்சியிலும் மின்வெட்டு ஏற்பட்ட காட்சிகள் சமூக வலைத்தளங்களில் வைரலாகி பரவின. அமைச்சர் கலந்துகொண்ட நிகழ்ச்சியில் ஏற்பட்ட இந்த மின்வெட்டு சம்பவம், பலரையும் அதிர்ச்சியில் ஆழ்த்தியுள்ளது.
