மேட்டூர் அணையில் இருந்து முதலமைச்சர் விஜய் தண்ணீர் திறந்து வைத்தது காலதாமதம் என்றும், இதனால் விவசாயிகளுக்குப் பயனில்லை என்றும் தேமுதிக பொதுச்செயலாளர் பிரேமலதா விஜயகாந்த் குற்றம் சாட்டியுள்ளார். சட்டப்பேரவையில் மானியக் கோரிக்கை மீதான விவாதத்தில் பேசிய அவர், சில பகுதிகளுக்கு தண்ணீர் செல்ல ஒரு வாரம் ஆகும் என்றும், அதுவரை பயிர்கள் காய்ந்துவிடும் என்றும் கவலை தெரிவித்தார். எனவே, விவசாயிகளின் நலனைக் கருத்தில் கொண்டு முழுப் பயிர்க்கடனையும் தள்ளுபடி செய்ய வேண்டும் என வலியுறுத்தினார்.
மேலும், நெசவாளர்களின் வாழ்வாதாரத்தைக் காக்க அரசு நடவடிக்கை எடுக்க வேண்டும் என்றும் பிரேமலதா விஜயகாந்த் கோரிக்கை விடுத்தார். பழைய ரக சேலைகளை அரசு கொள்முதல் செய்ய வேண்டும் என்றும், கைத்தறி நெசவுக்கான விலையை அரசே நிர்ணயம் செய்ய வேண்டும் என்றும் அவர் கூறினார். விருத்தாசலம் தொகுதியில் கோ ஆப் டெக்ஸ் நிறுவனத்தை உரம் உயர்த்த வேண்டும் என்றும் அவர் வலியுறுத்தினார்.
தமிழ்நாட்டில் சுமார் 4 லட்சம் நெசவுத் தொழிலாளர்கள் வாழ்வாதாரத்திற்காக உள்ளனர். இவர்களின் கூலி முறையை ஒழுங்குபடுத்த இதுவரை அதிகாரப்பூர்வ அரசாணை வெளியிடப்படவில்லை. எனவே, இதற்கான தனி அரசாணையை அரசு உடனடியாகப் பிறப்பிக்க வேண்டும் என பிரேமலதா விஜயகாந்த் வலியுறுத்தினார். சேலம் இளம்பிள்ளையில் டெக்ஸ்டைல் பார்க் அமைக்க நடவடிக்கை எடுக்க வேண்டும் என்றும் அவர் கோரிக்கை விடுத்தார்.
தூத்துக்குடி முள்ளக்காடு கிராமத்தில் உப்பளங்களைப் பாதிக்கும் வகையில் கப்பல் கட்டும் தளம் அமைக்கப்படுவதாகவும், இதனால் ஒரு லட்சத்திற்கும் அதிகமான தொழிலாளர்கள் பாதிக்கப்படுவதாகவும் அவர் குறிப்பிட்டார். விவசாயிகள் பாதுகாக்கப்படுவதைப் போல, உப்பு உற்பத்தியாளர்களும் பாதுகாக்கப்பட வேண்டும் என்றும் அவர் கோரிக்கை விடுத்தார். நெசவாளர்களுக்கு உதவி மற்றும் ஊக்கத் தொகையை அரசு வழங்க வேண்டும் என்றும் அவர் வலியுறுத்தியுள்ளார்.
