இந்திய வாகனச் சந்தையில் மாருதி சுசுகி நிறுவனத்தின் பிரீமியம் எஸ்.யூ.வி மாடலான கிராண்ட் விட்டாரா, அறிமுகப்படுத்தப்பட்ட குறுகிய காலத்திலேயே 4 லட்சம் யூனிட்டுகள் விற்பனையாகி ஒரு மிகப்பெரிய மைல்கல்லை எட்டியுள்ளது.
கடும் போட்டி நிறைந்த எஸ்.யூ.வி சந்தையில், ஹூண்டாய் க்ரெட்டா, கியா செல்டோஸ், ஹோண்டா எலிவேட், டொயோட்டா ஹைரைடர், ஸ்கோடா குஷாக், ஃபோக்ஸ்வேகன் டைகுன் மற்றும் எம்.ஜி ஆஸ்டர் போன்ற முன்னணி மாடல்களுக்குக் கடுமையான சவாலாக கிராண்ட் விட்டாரா திகழ்கிறது.
மொத்த விற்பனையில், மைல்டு ஹைபிரிட் மாடல்கள் 52 சதவீத பங்களிப்புடன் முன்னிலை வகிக்கின்றன. அதனைத் தொடர்ந்து, சிஎன்ஜி மாடல்கள் 34 சதவீதமும், ஸ்ட்ராங் ஹைபிரிட் மாடல்கள் 14 சதவீதமும் விற்பனையில் முக்கியப் பங்கு வகித்துள்ளன.
தனது பிரிவிலேயே ஆல் வீல் டிரைவ், சிஎன்ஜி, மைல்டு ஹைபிரிட் மற்றும் ஸ்ட்ராங் ஹைபிரிட் எனப் பல்வேறு பவர்ட்ரெய்ன் தேர்வுகளை வழங்கும் ஒரே எஸ்.யூ.வி என்ற தனித்துவத்தையும் கிராண்ட் விட்டாரா பெற்றுள்ளது.
குறிப்பாக, கிராண்ட் விட்டாராவின் ஸ்ட்ராங் ஹைபிரிட் வேரியண்ட், லிட்டருக்கு 27.97 கிலோமீட்டர் மைலேஜ் (ARAI சான்றிதழ் பெற்றது) வழங்கும் திறனைக் கொண்டுள்ளது. இந்த மாடலில் 45 லிட்டர் கொள்ளளவு கொண்ட எரிபொருள் டேங்க் பொருத்தப்பட்டுள்ளது. இதன் மூலம், ஒருமுறை டேங்கை முழுமையாக நிரப்பினால், 1200 கிலோமீட்டருக்கும் அதிகமான தூரத்தை இந்த கார் கடக்கும் 'ரேஞ்சை' (Range) வழங்குகிறது.
கம்பீரமான வெளிப்புற வடிவமைப்புடன், பிரம்மாண்டமான முன்பக்க கிரில், எல்.இ.டி டி.ஆர்.எல்-கள் மற்றும் 3-எலிமெண்ட் எல்.இ.டி டெயில்லைட்டுகள் ஆகியவை இதன் சிறப்பம்சங்களாகும். காரின் உட்புறத்தில் 9 இன்ச் டச்ஸ்கிரீன் இன்ஃபோடெயின்மென்ட் சிஸ்டம், பனோரமிக் சன்ரூஃப், வென்டிலேட்டட் முன் இருக்கைகள், 360 டிகிரி கேமரா மற்றும் ஹெட்ஸ்-அப் டிஸ்ப்ளே போன்ற நவீன வசதிகள் வாடிக்கையாளர்களுக்கு வழங்கப்பட்டுள்ளன.
இந்திய சந்தையில் மாருதி சுசுகி கிராண்ட் விட்டாரா காரின் ஆரம்ப விலை ரூ.11 லட்சத்தில் இருந்து தொடங்குகிறது. இதன் டாப் எண்ட் வேரியண்டின் விலை ரூ.20.09 லட்சம் (எக்ஸ் ஷோரூம்) வரை விற்பனை செய்யப்படுகிறது.
இந்த அசத்தல் விற்பனை மைல்கல்லை எட்டியதன் மூலம், மாருதி சுசுகி கிராண்ட் விட்டாரா இந்திய எஸ்.யூ.வி சந்தையில் தனது வலுவான இடத்தைத் தொடர்ந்து தக்கவைத்துக் கொண்டுள்ளது.
