மகாராஷ்டிர மாநிலம், தஹிபாலே குடும்பத்தில் சுமார் 200 ஆண்டுகளாக பெண் குழந்தை பிறக்காத நிலையில், தற்போது பிறந்த குழந்தைக்கு 'கர்கி' எனப் பெயரிட்டுள்ளனர். நான்கு தலைமுறைகளுக்குப் பிறகு முதன்முறையாக ஒரு பெண் குழந்தை பிறந்துள்ளதை குடும்பத்தினர் மிகுந்த உற்சாகத்துடன் கொண்டாடி வருகின்றனர்.
மருத்துவமனையில் பிரசவம் முடிந்த பிறகு, தாய் மற்றும் குழந்தையை வீட்டிற்கு அழைத்து வந்தபோது, குடும்பத்தினர் அவர்களை பாரம்பரிய மேளதாளங்கள் முழங்க, கிராமிய நடனங்களுக்கு நடுவே வரவேற்றனர். அலங்கரிக்கப்பட்ட சாரட் வண்டியில் தாய் மற்றும் குழந்தையை ஏற்றி, ஊர்வலமாக வீட்டிற்கு அழைத்து வந்தனர். இந்த நிகழ்வு அப்பகுதியில் பெரும் வரவேற்பைப் பெற்றது.
குழந்தையின் தாத்தா லிம்பாஜி தஹிபாலே நெகிழ்ச்சியுடன் கூறுகையில், 'குடும்பத்தில் ஒரு பெண் குழந்தை பிறப்பது பெரும் பாக்கியம். பல ஆண்டுகளாக பெண் இல்லாத குறை இன்று நிறைவேறியுள்ளது. எனது இரண்டு மருமகள்களையும் சொந்த மகள்களைப் போலவே நடத்தி வந்தேன். இன்று பேத்தியை இசை மற்றும் நடனத்துடன் தேரில் வீட்டிற்கு அழைத்து வந்ததில் மிகுந்த மகிழ்ச்சி அடைகிறேன்' என்றார்.
குழந்தையின் பாட்டி சுரேகா தஹிபாலே கூறுகையில், 'இன்று எங்கள் வீட்டிற்கு லட்சுமி வந்திருக்கிறாள் என்பதில் மிகுந்த மகிழ்ச்சி அடைகிறோம். இது எங்கள் குடும்பத்திற்கு ஒரு பொன்னான நாள்' என்று தெரிவித்தார்.
குழந்தையின் தந்தை கூறுகையில், 'பொதுவாக மக்கள் ஆண் குழந்தையையே விரும்புவார்கள். ஆனால் பெண் குழந்தை பெறும் உணர்வும் மகிழ்ச்சியும் வேறு விதமானது. மகள்கள் தந்தையிடம் அதிக பாசம் கொண்டவர்கள். எங்கள் மகளை ஒரு மலரைப் போல வளர்ப்போம்' என மகிழ்ச்சியுடன் தெரிவித்தார். இந்த மகிழ்ச்சியான தருணத்தை குடும்பத்தினர் அனைவரும் ஒருமித்த குரலில் கொண்டாடினர்.
இந்த அரிய நிகழ்வு, தஹிபாலே குடும்பத்தினரிடையே மட்டுமல்லாமல், அப்பகுதி மக்களிடையேயும் பெரும் மகிழ்ச்சியையும், உற்சாகத்தையும் ஏற்படுத்தியுள்ளது. 200 ஆண்டுகால பெண் குழந்தை பிறக்காத ஏக்கத்தை போக்கியுள்ள இந்த நிகழ்வு, பல தலைமுறைகளுக்கு ஒரு மறக்க முடியாத அனுபவமாக அமைந்துள்ளது.
