மதுரை மாநகரில் பெரும் பரபரப்பை ஏற்படுத்திய தனிஷ்க் நகைக்கடை கொள்ளை சம்பவம் தொடர்பாக, சந்தேகத்தின் பேரில் பட்டதாரி இளைஞர் ஒருவரின் வீட்டில் காவல்துறையினர் தீவிர விசாரணை மேற்கொண்டு வருகின்றனர்.
மதுரை பைபாஸ் சாலையில் புதிதாகத் தொடங்கப்பட்ட தனிஷ்க் ஜுவல்லரி நகைக்கடையில், கடந்த 12ஆம் தேதி அதிகாலை சுமார் 4 மணியளவில் ஒரு மர்ம நபர் புகுந்து, அங்கிருந்த ஏராளமான தங்க நகைகளைக் கொள்ளையடித்துச் சென்றார். இந்த துணிகர சம்பவம் தொடர்பாக, குற்றவாளியைப் பிடிக்க காவல்துறையினர் 9 தனிப்படைகளை அமைத்து தீவிர விசாரணை நடத்தி வருகின்றனர்.
கொள்ளைச் சம்பவத்திற்கு சில மணி நேரங்களுக்கு முன்பு, அதாவது நள்ளிரவு சுமார் 1 மணியளவில், முகமூடி அணிந்த மர்ம நபர் ஒருவர் பதிவெண் இல்லாத ஸ்கூட்டியில் நகைக்கடையின் பின்புறப் பகுதிக்கு வந்ததாகத் தகவல் வெளியாகியுள்ளது. அவர் ஹெல்மெட் அணிந்திருந்ததும், முகத்தை மறைத்திருந்ததும் தெரியவந்துள்ளது. ஸ்கூட்டியை நிறுத்திவிட்டு கீழே இறங்கிய அவர், நகைக்கடையின் பின்புறப் பகுதியை நோட்டமிட்டுள்ளார். அப்போது அப்பகுதியில் இருந்த நாட்டு நாய்கள் அவரைத் துரத்தியதாகவும், இதனால் அதிர்ச்சியடைந்த அவர் அங்கிருந்து தப்பிச் சென்றதாகவும் கூறப்படுகிறது. இந்த காட்சிகள், நகைக்கடையின் பின்புறம் உள்ள தனியார் டிராவல்ஸ் நிறுவனத்தின் கண்காணிப்பு கேமராவில் பதிவாகியுள்ளன.
இந்நிலையில், இந்த நகை கொள்ளை வழக்கில் சந்தேகத்தின் பேரில், மதுரை பழங்காநத்தம் அருட்பெருஞ்ஜோதி தெருவில் வசிக்கும் பட்டதாரி இளைஞர் நிஷாந்த் கிருஷ்ணா என்பவரின் வீட்டில் காவல்துறையினர் தீவிர சோதனை மேற்கொண்டு வருகின்றனர். சுமார் 4 மணி நேரத்திற்கும் மேலாக இந்த சோதனை நீடித்து வருகிறது.
வீட்டில் உள்ள தண்ணீர் தொட்டிகள், சுவர் பகுதிகள், அறைகள் என அனைத்து இடங்களிலும் காவல்துறையினர் தீவிரமாகத் தேடி வருகின்றனர். பட்டதாரி இளைஞரின் வீட்டில் காவல்துறையினர் சோதனை நடத்தி வருவதால், அப்பகுதியில் ஏராளமான காவல்துறையினர் குவிக்கப்பட்டுள்ளனர்.
சோதனை நடத்தப்படும் வீடு, பழங்காநத்தம் பகுதியைச் சேர்ந்த 20 வயது பட்டதாரி இளைஞருக்குச் சொந்தமானது என்றும், இவர் யூடியூபராகவும், பைக் டாக்ஸி ஓட்டுநராகவும் பணியாற்றி வருவதாகவும் தகவல்கள் தெரிவிக்கின்றன. கொள்ளைச் சம்பவத்திற்கு முன்பு, வாடிக்கையாளர் போல நடித்து மூன்று முறை கடைக்கு வந்து சென்ற நபரின் சிசிடிவி காட்சிகளின் அடிப்படையில் இந்த சோதனை நடத்தப்படுவதாகக் கூறப்படுகிறது.
இந்த சம்பவம் தொடர்பாக காவல்துறையினர் தொடர்ந்து விசாரணை மேற்கொண்டு வருகின்றனர். கொள்ளையன் யார், நகைகள் எங்கே மறைத்து வைக்கப்பட்டிருக்கின்றன என்பது குறித்த விவரங்களை அறிய தீவிர விசாரணை நடந்து வருகிறது. தனிஷ்க் நகைக்கடை கொள்ளை சம்பவம், மதுரையில் பெரும் அதிர்வலைகளை ஏற்படுத்தியுள்ளது.
