மதுரை அருள்மிகு மீனாட்சி சுந்தரேஸ்வரர் திருக்கோவிலில் 17 ஆண்டுகளுக்குப் பிறகு இன்று காலை மகா கும்பாபிஷேக விழா வெகு விமரிசையாக நடைபெற்றது. அதிகாலை 7.40 மணியளவில் 12 கோபுரங்கள் மீது புனித நீர் ஊற்றப்பட்டு, 'சிவ சிவ' என்ற பக்தி கோஷங்களுக்கு மத்தியில் இந்த வரலாற்று சிறப்புமிக்க நிகழ்வு நிறைவடைந்தது.
கடந்த 2009ஆம் ஆண்டுக்கு பிறகு தற்போது நடைபெற்றுள்ள இந்த கும்பாபிஷேக விழாவில், லட்சக்கணக்கான பக்தர்கள் பங்கேற்பார்கள் என எதிர்பார்க்கப்பட்ட நிலையில், அதற்கான விரிவான ஏற்பாடுகள் கடந்த இரண்டு மாதங்களுக்கும் மேலாக இந்து சமய அறநிலையத்துறை, காவல்துறை, தீயணைப்புத் துறை உள்ளிட்ட பல்வேறு துறைகளின் ஒருங்கிணைப்புடன் மேற்கொள்ளப்பட்டன. பக்தர்களின் பாதுகாப்பு, அடிப்படை வசதிகள் மற்றும் அசம்பாவித தடுப்பு நடவடிக்கைகள் தீவிரமாக கண்காணிக்கப்பட்டன.
இந்த மாபெரும் கும்பாபிஷேக விழாவிற்காக, வடக்கு ஆடி வீதியில் 184 குண்டங்களுடன் கூடிய பிரம்மாண்ட யாகசாலை அமைக்கப்பட்டது. மூலவர் மீனாட்சி அம்மன் மற்றும் சுந்தரேஸ்வரருக்காக பிரத்யேக தங்க குடங்கள் யாகசாலையில் வைக்கப்பட்டன. கங்கை, காவிரி, வைகை உள்ளிட்ட பல்வேறு புண்ணிய நதிகளில் இருந்து கொண்டுவரப்பட்ட புனித நீர் கலசங்களில் நிரப்பப்பட்டு, தினமும் யாகசாலை பூஜைகளில் பயன்படுத்தப்பட்டன. சுமார் 400-க்கும் மேற்பட்ட சிவாச்சாரியார்கள் இந்த வேள்விகளை நடத்தினர்.
கடந்த 11-ஆம் தேதி முதல் கால யாக பூஜைகள் தொடங்கின. தொடர்ந்து மற்ற கால பூஜைகளும் நடைபெற்றன. நேற்று முன்தினம் அதிகாலை 3.45 மணியளவில் 10-ஆம் கால யாகசாலை பூஜைகள் நிறைவடைந்தன. அதனைத் தொடர்ந்து, பரிவார தெய்வங்களுக்கான கும்பாபிஷேகம் மேளதாளங்கள் முழங்க, யானை மற்றும் மாடு அணிவகுப்புகளுடன் கோலாகலமாக நடைபெற்றது.
நேற்று காலை 5 மணி முதல் 6 மணிக்குள் சித்தி விநாயகர், கூடல்குமாரர், தட்சிணாமூர்த்தி, துர்க்கை, மகாலட்சுமி, பத்திரகாளி, அக்னி வீரபத்திரர், 63 நாயன்மார்கள், நவகிரகங்கள் உள்ளிட்ட 414 பரிவார தெய்வங்களுக்கு புனித நீர் ஊற்றி கும்பாபிஷேகம் செய்யப்பட்டது. மூலவர் மீனாட்சி அம்மன், சுந்தரேஸ்வரர், தங்க விமானங்கள், சன்னதி விமானங்கள் மற்றும் 12 கோபுரங்கள் உள்ளிட்டவற்றுக்கான கும்ப கலசங்களுக்கு நேற்று மாலை 11-ம் கால யாகசாலை பூஜைகள் நடைபெற்றன. இதில் பல்லாயிரக்கணக்கான பக்தர்கள் கலந்துகொண்டு தரிசனம் செய்தனர்.
விழாவின் உச்சகட்டமாக, இன்று காலை மீனாட்சி அம்மன் – சுந்தரேஸ்வரர் மகா கும்பாபிஷேக விழா நடைபெற்றது. அதிகாலை 3.45 மணிக்கு 12-ம் கால யாக பூஜை நடத்தப்பட்டது. தொடர்ந்து, யாகசாலையில் பூஜிக்கப்பட்ட புனித நீர் கலசங்கள் காலை 5.45 மணிக்கு புறப்பாடாகி, சிவாச்சாரியர்களால் 4 ராஜ கோபுரங்கள் மற்றும் 12 தங்க விமானங்களுக்கு கொண்டு செல்லப்பட்டன.
சரியாக காலை 7.40 மணியளவில், 12 கோபுரங்களுக்கு மகா கும்பாபிஷேகம் வெகு விமரிசையாக நடைபெற்றது. புனித நீர் கலசங்களில் இருந்து ஊற்றப்பட்டபோது, அங்கு கூடியிருந்த லட்சக்கணக்கான பக்தர்கள் பரவசத்துடன் சாமி தரிசனம் செய்தனர். பக்தர்களின் 'சிவ சிவ' என்ற பக்தி கோஷங்கள் விண்ணை முட்டின. பின்னர் சிறப்பு தீபாராதனை காட்டப்பட்டது.
கும்பாபிஷேகத்தை கோவிலின் மேல் தளத்தில் இருந்து காண சுமார் 9 ஆயிரம் பக்தர்களுக்கு அனுமதி வழங்கப்பட்டது. நான்கு மாசி வீதிகளிலும் பக்தர்கள் கூட்டம் அலைமோதியது. 17 ஆண்டுகளுக்குப் பிறகு நடைபெற்ற இந்த கும்பாபிஷேக விழாவைக் காண தமிழகம் மட்டுமின்றி, பல்வேறு மாநிலங்களில் இருந்தும் பக்தர்கள் திரண்டு வந்தனர்.
