சென்னை பெருநகர வளர்ச்சி குழுமத்தின் கட்டுப்பாட்டில் உள்ள கோயம்பேடு ஆம்னி பேருந்து நிலையத்தில், பேருந்துகளுக்கான நுழைவுக் கட்டணம் திடீரென 233% உயர்த்தப்பட்டதற்கு ஆம்னி பேருந்து உரிமையாளர்கள் சங்கம் கடும் எதிர்ப்பு தெரிவித்துள்ளது. இது தொடர்பாக தமிழக முதலமைச்சர் விஜய்க்கு சங்கம் கடிதம் எழுதியுள்ளது.
தற்போது 24 மணி நேரத்திற்கு ரூ.150 வசூலிக்கப்பட்டு வந்த நுழைவுக் கட்டணம், வரும் அக்டோபர் 15, 2026 முதல் ரூ.500 ஆக உயர்த்தப்படும் என எந்தவித முன்னறிவிப்பும், ஆலோசனையும் இன்றி அறிவிக்கப்பட்டுள்ளது. இந்த திடீர் உயர்வு, ஒரு பேருந்துக்கு ரூ.350 கூடுதலாகவும், சுமார் 233.33% அதிகமாகவும் அமைந்துள்ளது. இது பேருந்து உரிமையாளர்கள் மீது பெரும் பொருளாதார சுமையை ஏற்படுத்தும் என சங்கம் கவலை தெரிவித்துள்ளது.
ஏற்கனவே எரிபொருள், சாலை வரி, காப்பீடு, சுங்கக் கட்டணம் மற்றும் பராமரிப்பு செலவுகள் அதிகரித்து வருவதால் பேருந்து உரிமையாளர்கள் பெரும் சிரமத்தில் உள்ளனர். இந்த புதிய கட்டண உயர்வால், ஒரு பேருந்துக்கு மாதந்தோறும் முந்தைய செலவு ரூ.4,500-லிருந்து ரூ.15,000 ஆக உயர்ந்து, மாதம் ரூ.10,500 கூடுதல் செலவு ஏற்படும். இந்த கூடுதல் செலவு பயணிகளின் கட்டணத்திலும் பிரதிபலிக்கும் அபாயம் உள்ளது.
பேருந்து நிலைய பராமரிப்புக்கு நியாயமான கட்டணம் வசூலிப்பதை சங்கம் ஆதரிப்பதாகவும், ஆனால் இவ்வளவு பெரிய உயர்வை ஒரே நேரத்தில் அமல்படுத்துவது பேருந்து உரிமையாளர்களுக்கும் பயணிகளுக்கும் பெரும் சிரமத்தை ஏற்படுத்தும் என்றும் கடிதத்தில் குறிப்பிடப்பட்டுள்ளது.
எனவே, முதலமைச்சர் இதில் தலையிட்டு, உடனடியாக கீழ்க்கண்ட நடவடிக்கைகளை மேற்கொள்ளுமாறு ஆம்னி பேருந்து உரிமையாளர்கள் சங்கம் பணிவுடன் கேட்டுக்கொண்டுள்ளது:
1. அக்டோபர் 15, 2026 முதல் ஆம்னி பேருந்துகளுக்கான நுழைவுக் கட்டணத்தை ரூ.150-லிருந்து ரூ.500-ஆக உயர்த்தும் அறிவிப்பை உடனடியாக நிறுத்திவைக்க வேண்டும்.
2. கட்டண உயர்வு குறித்த மறுபரிசீலனை முடியும் வரை, முந்தைய ரூ.150 என்ற கட்டணத்தையே தொடர அனுமதிக்க வேண்டும்.
3. பெருநகர வளர்ச்சி குழும அதிகாரிகள், ஆம்னி பேருந்து உரிமையாளர்கள் சங்க பிரதிநிதிகளுடன் கலந்தாலோசித்து, நியாயமான நுழைவுக் கட்டணத்தை நிர்ணயிக்க வேண்டும்.
4. நுழைவுக் கட்டணத்தை பாஸ்டேக் முறையில் வசூலிப்பதுடன், பேருந்து நிலையத்தின் அடிப்படை வசதிகளான கழிப்பறைகள், குடிநீர், விளக்குகள், தூய்மை, பாதுகாப்பு மற்றும் வாகன நிறுத்துமிட வசதிகளை மேம்படுத்த வேண்டும்.
5. தற்போதுள்ள கோயம்பேடு ஆம்னி பேருந்து நிலையத்தில் சுமார் 150 பேருந்துகளை மட்டுமே நிறுத்த முடியும் நிலையில், தினமும் இயக்கப்படும் 1,000-க்கும் மேற்பட்ட ஆம்னி பேருந்துகளை இயக்க போதுமான இடவசதி இல்லை. எனவே, பயன்பாடின்றி உள்ள சிஎம்டிஏ கோயம்பேடு பேருந்து நிலையத்தை ஆம்னி பேருந்துகளின் பயன்பாட்டிற்கு தற்காலிகமாகவோ அல்லது நிரந்தரமாகவோ ஒதுக்கீடு செய்ய வேண்டும்.
இந்த இடவசதி மூலம், பயணிகள் மெட்ரோ ரயில் மற்றும் மாநகர பேருந்து இணைப்பு வசதிகளை பயன்படுத்தி எளிதாக பேருந்து நிலையத்தை அடைய முடியும். மேலும், சாலையோரங்களில் பயணிகளை ஏற்றி இறக்குவதால் ஏற்படும் இடையூறுகள் குறைந்து, கோயம்பேடு மற்றும் சுற்றுப்புற பகுதிகளில் போக்குவரத்து நெரிசல் குறையும் என்றும் சங்கம் தெரிவித்துள்ளது.
பொதுமக்களின் பயண வசதி, ஆம்னி பேருந்து உரிமையாளர்களின் பொருளாதார நிலை, பொதுப் போக்குவரத்தை ஊக்குவித்தல் மற்றும் பயணிகளின் சிரமங்களைக் குறைத்தல் ஆகியவற்றை கருத்தில் கொண்டு, உரிய நடவடிக்கை எடுத்து உதவுமாறு முதலமைச்சரிடம் சங்கம் கோரிக்கை விடுத்துள்ளது.
