இந்தியாவின் முன்னணி கார் தயாரிப்பு நிறுவனமான கியா, தனது புதிய காரென்ஸ் க்ளாவிஸ் மின்சார கார் மாடலுக்காக ஒரு அசத்தல் சலுகையை அறிவித்துள்ளது. பேட்டரியை வாடகைக்கு எடுக்கும் 'பேட்டரி அஸ் எ சர்வீஸ்' (BaaS) முறையை அறிமுகப்படுத்தியுள்ளதன் மூலம், வாடிக்கையாளர்கள் வெறும் ரூ.26,000 மாத தவணையில் இந்த காரை சொந்தமாக்கிக் கொள்ள முடியும். இதன் மூலம், மின்சார வாகன பயன்பாட்டை ஊக்குவிக்கும் வகையில், கியா இந்த புதிய திட்டத்தை இந்தியாவில் அறிமுகப்படுத்தியுள்ளது.
இந்த புதிய சலுகையின் கீழ், காரென்ஸ் க்ளாவிஸ் காரின் வாகனத்திற்கும், பேட்டரிக்கும் தனித்தனியாக கடன் திட்டங்கள் வழங்கப்படுகின்றன. வாடிக்கையாளர்கள் வெறும் 51,520 ரூபாயை முன்பணமாக செலுத்தி இந்த காரை வாங்கலாம். மேலும், ஒரு கிலோமீட்டர் பயணத்திற்கு வெறும் 3 ரூபாய் 30 காசுகள் என்ற கட்டணத்தில் பேட்டரியை வாடகைக்கு பயன்படுத்திக் கொள்ளலாம். இந்த திட்டம், வாகனத்திற்கு 60 மாதங்கள் வரையிலும், பேட்டரி பாகத்திற்கு 96 மாதங்கள் வரையிலும் தவணைக்கால விருப்பங்களை வழங்குகிறது. இதன் மூலம், வாகனத்தின் விலையில் சுமார் 7 லட்சம் ரூபாய் வரை குறைவான விலையில் காரை சொந்தமாக்க முடியும்.
இந்த சிறப்பு சலுகைக்கு ஐசிஐசிஐ வங்கி, எச்டிஎஃப்சி வங்கி, ஆக்சிஸ் வங்கி, கோடக் மஹிந்திரா வங்கி மற்றும் பஜாஜ் ஃபின்சர்வ் உள்ளிட்ட முன்னணி நிதி நிறுவனங்கள் ஆதரவு அளித்துள்ளன. ஸ்டாண்டர்ட் வேரியண்ட் கார் எக்ஸ்-ஷோரூம் விலை ரூ.17,99,000 ஆகும். இதில், ரூ.51,520 முன்பணம், பேட்டரி இல்லாமல் காரின் விலை ரூ.12.84 லட்சம், மாதாந்திர தவணை ரூ.26,650 மற்றும் பேட்டரி வாடகை ரூ.3.3/கி.மீ. ஆகும். எக்ஸ்டெண்டர்ட் வேரியண்ட் கார் எக்ஸ்-ஷோரூம் விலை ரூ.21,99,000. இதில், ரூ.60,452 முன்பணம், பேட்டரி இல்லாமல் காரின் விலை ரூ.15.94 லட்சம், மாதாந்திர தவணை ரூ.33,099 மற்றும் பேட்டரி வாடகை ரூ.3.3/கி.மீ. ஆகும்.
வாடிக்கையாளர்களுக்கு தடையற்ற அனுபவத்தை வழங்க, கியா தனது சார்ஜிங் கட்டமைப்பையும் வலுப்படுத்தி வருகிறது. MyKia செயலி மூலம் நாடு முழுவதும் 15,000-க்கும் மேற்பட்ட சார்ஜிங் மையங்களை அணுகலாம். மேலும், 100-க்கும் மேற்பட்ட கியா டீலர்ஷிப்களில் DC ஃபாஸ்ட் சார்ஜர்கள் பொருத்தப்பட்டுள்ளன. கியா காரென்ஸ் க்ளாவிஸ் 42kWh மற்றும் 51.4kWh பேட்டரி ஆப்ஷன்களுடன் 490 கி.மீ வரை ரேஞ்ச் வழங்கும். இதில் 64 வண்ண ஆம்பியண்ட் லைட்டிங், பனோரமிக் சன்ரூஃப், வென்டிலேட்டட் இருக்கைகள், போஸ் ஆடியோ சிஸ்டம், டூயல் பனோரமிக் டிஸ்பிளே, 12.25 இன்ச் இன்ஃபோடெயின்மெண்ட் சிஸ்டம், லெவல் 2 ADAS, 6 ஏர்பேக்குகள் மற்றும் 360 டிகிரி கேமரா போன்ற அம்சங்கள் உள்ளன.
