இந்திய சந்தையில் கவாஸாகி நிறுவனம் தனது புதிய டூயல்-ஸ்போர்ட் பைக்கான கே.எல்.எக்ஸ் 230எஸ் (Kawasaki KLX230S) மாடலை அதிகாரப்பூர்வமாக அறிமுகப்படுத்தியுள்ளது. கரடுமுரடான ஆஃப்-ரோடு சவாரிகளுக்கும், தினசரி சாலைப் பயன்பாட்டிற்கும் ஏற்றவாறு இந்த பைக் வடிவமைக்கப்பட்டுள்ளது.
இந்த பைக்கில் 233சிசி திறன் கொண்ட, ஏர்-கூல்டு, சிங்கிள் சிலிண்டர் இன்ஜின் பொருத்தப்பட்டுள்ளது. இது அதிகபட்சமாக 18.1 பிஎஸ் பவரையும், 18.3 என்எம் டார்க் திறனையும் வெளிப்படுத்தும் வகையில் ட்யூன் செய்யப்பட்டுள்ளது. மேலும், இதில் 6 ஸ்பீடு கியர்பாக்ஸ் இணைக்கப்பட்டுள்ளது.
இந்த பைக்கின் மிக முக்கிய சிறப்பம்சமே இதன் இருக்கை உயரம்தான். வழக்கமான ஆஃப்-ரோடு பைக்குகளின் இருக்கை மிக உயரமாக இருக்கும். ஆனால், இந்திய வாடிக்கையாளர்களின் வசதியைக் கருத்தில் கொண்டு, இந்த 'S' வேரியண்டின் இருக்கை உயரம் 830 மி.மீ ஆக குறைக்கப்பட்டுள்ளது. இதனால் நடுத்தர உயரம் கொண்டவர்களும் பைக்கை சிரமமின்றி கையாள முடியும். சிறந்த கிரவுண்ட் கிளியரன்ஸ் கொண்ட இந்த பைக்கில், முன்புறம் 21-இன்ச் மற்றும் பின்புறம் 18-இன்ச் வயர் ஸ்போக் வீல்கள் டூயல் பர்ப்பஸ் டயர்களுடன் வழங்கப்பட்டுள்ளன.
மேடு பள்ளங்களை எளிதாகச் சமாளிக்க முன்புறம் 158 மி.மீ டிராவல் கொண்ட டெலிஸ்கோபிக் ஃபோர்க்கும், பின்புறம் 168 மி.மீ டிராவல் கொண்ட மோனோஷாக் சஸ்பென்ஷனும் கொடுக்கப்பட்டுள்ளது. பாதுகாப்பிற்காக இரு சக்கரங்களிலும் டிஸ்க் பிரேக் மற்றும் டூயல் சேனல் ஏபிஎஸ் வசதி உள்ளது. ஆஃப்-ரோடிங் செல்லும்போது தேவைக்கேற்ப பின்புற ஏபிஎஸ்-ஐ மட்டும் ஆஃப் செய்து கொள்ளும் வசதியும் இதில் உள்ளது. இதில் எல்.இ.டி ஹெட்லைட் அமைப்பு மற்றும் ஸ்மார்ட்போன் கனெக்டிவிட்டி வசதியுடன் கூடிய முழுமையான எல்.சி.டி டிஜிட்டல் இன்ஸ்ட்ரூமென்ட் கிளஸ்டர் இடம்பெற்றுள்ளது. இந்த புதிய கவாஸாகி KLX230S பைக்கின் அறிமுக விலை ரூ. 2.19 லட்சம் என நிர்ணயம் செய்யப்பட்டுள்ளது.
