திருச்சியைச் சேர்ந்த பாஜக ஓபிசி அணி மாநிலச் செயலாளர் திவ்யா சேஷாத்ரி அளித்த புகாரின் அடிப்படையில், தனது மீது சுமத்தப்பட்டுள்ள குற்றச்சாட்டுகளும், அதன் விளைவாக எடுக்கப்பட்ட நடவடிக்கையும் ஏற்கத்தக்கதல்ல என்று கருப்பு முருகானந்தம் விளக்கம் அளித்துள்ளார். பொய்யான குற்றச்சாட்டுகளின் அடிப்படையில் முறையான விசாரணை இன்றி தன்னை பொறுப்பிலிருந்து நீக்கியுள்ளதாக அவர் தெரிவித்துள்ளார்.
திவ்யா சேஷாத்ரி தனது புகாரில், கருப்பு முருகானந்தம் பல ஆண்டுகளாக தன்னுடன் தொடர்பில் இருந்து, குழந்தை பெற்றுக் கொண்ட பின்னரும் திருமணம் செய்து கொள்ள மறுப்பதாகக் குற்றம்சாட்டியுள்ளார். மேலும், தன்னை திருமணம் செய்து கொள்வதாகக் கூறி ஏமாற்றியதாகவும், தனது குழந்தைகளின் பள்ளிப் பதிவேடுகளில் அவரே பாதுகாவலராக கையெழுத்திட்டுள்ளதாகவும் குறிப்பிட்டுள்ளார். 2026 சட்டமன்றத் தேர்தலில் ஸ்ரீரங்கம் தொகுதியில் போட்டியிட வாய்ப்பு வாங்கித் தருவதாக உறுதியளித்ததாகவும் அவர் தெரிவித்துள்ளார்.
இந்தத் தொடர்பின் காரணமாக தான் கர்ப்பமடைந்ததாகவும், ஆனால் தனது விருப்பத்திற்கு மாறாக கருவைக் கலைக்க அவர் கட்டாயப்படுத்தியதாகவும் திவ்யா சேஷாத்திரி தனது புகாரில் பகிரங்கமாகக் குற்றம்சாட்டியுள்ளார். இந்த சம்பவங்கள் தொடர்பான ஆதாரங்கள் கட்சி மேலிடத்திற்கு சென்றன.
இதனையடுத்து, மாநிலத் தலைவர் நயினார் நாகேந்திரன் உடனடியாக நடவடிக்கை எடுத்து, பாஜக பொதுச்செயலாளர் பதவியில் இருந்து கருப்பு முருகானந்தத்தை நீக்கி உத்தரவிட்டார். இந்த அதிரடி நடவடிக்கை அரசியல் வட்டாரத்தில் பரபரப்பை ஏற்படுத்தியது.
இந்நிலையில், கருப்பு முருகானந்தம் தனது விளக்கத்தில், செயற்கை நுண்ணறிவு தொழில்நுட்பத்தின் மூலம் போலியாக உருவாக்கப்பட்ட புகைப்படங்கள் மூலம் தன் மீது நடவடிக்கை எடுக்கப்பட்டுள்ளதாகக் கூறியுள்ளார். புனையப்பட்ட போலிப் புகார் மனுவை மட்டுமே அடிப்படையாகக் கொண்டு தன் மீது நடவடிக்கை எடுத்திருப்பதை ஒருபோதும் ஏற்றுக்கொள்ள முடியாது என்றும் அவர் திட்டவட்டமாகத் தெரிவித்துள்ளார்.
மேலும், இத்தகைய போலிச் செய்திகளையும், வதந்திகளையும் பரப்புவோர் மீது மிகக் கடுமையான சட்ட நடவடிக்கை எடுக்கப்படும் என்றும் அவர் எச்சரித்துள்ளார். இந்த விவகாரம் பாஜகவில் சலசலப்பை ஏற்படுத்தியுள்ளது.
