கணவரை விட அதிகமாக சம்பாதிக்கும், பொருளாதார ரீதியாக சுதந்திரமான மனைவி, அவர் ஒரு பெண் என்பதால் மட்டுமே ஜீவனாம்சம் கோர முடியாது என கர்நாடக உயர்நீதிமன்றம் அதிரடி தீர்ப்பளித்துள்ளது. மனைவியை விட குறைவான வருமானம் ஈட்டும் கணவனை ஜீவனாம்சம் தருமாறு கட்டாயப்படுத்துவது நியாயமற்றது என்று கூறி, மாதம் ரூ.20,000 இடைக்கால ஜீவனாம்சம் வழங்க வேண்டும் என கணவருக்கு கீழ் நீதிமன்றம் பிறப்பித்த உத்தரவை கர்நாடக உயர் நீதிமன்றம் ரத்து செய்துள்ளது.
மனைவி பொருளாதார ரீதியாக நல்ல நிலையில் இருக்கும்போதும், மனைவியின் வருமானம் கணவரின் வருமானத்தை விட அதிகமாக இருக்கும்போதும், குழந்தைகளைப் பராமரிப்பது போன்ற வேறு எந்தப் பொறுப்புகளும் மனைவியின் மீது இல்லாதபட்சத்தில், பெண்களை ஆண்கள் தான் பராமரிக்க வேண்டும் என்றோ அல்லது மனைவியை அவளது கணவர் தான் பராமரிக்க வேண்டும் என்றோ கூறி, ஜீவனாம்சம் வழங்கி நீதிமன்றங்கள் உத்தரவு பிறப்பிக்கக் கூடாது என்று நீதிபதி சுமலதா தனது தீர்ப்பில் தெளிவுபடுத்தியுள்ளார்.
கணவரின் தகுதிக்கேற்ப தன்னைத் தானே பராமரித்துக் கொள்ள மனைவிக்கு நிதி ஆதாரங்கள் இல்லை என்பது நிரூபிக்கப்படும் பட்சத்தில் மட்டுமே, நீதிமன்றங்கள் இடைக்கால அல்லது இறுதித் ஜீவனாம்சத்தை வழங்கக் கடமைப்பட்டுள்ளன என்பதை உயர் நீதிமன்றம் நினைவூட்டியுள்ளது. 2024-ல் திருமணம் செய்துகொண்ட தம்பதியினர், இரண்டு மாதங்கள் மட்டுமே ஒன்றாக வாழ்ந்துள்ளனர்.
இந்நிலையில், திருமணத்திற்காகப் பெற்ற கடனைத் திருப்பிச் செலுத்த வேண்டும் என்ற மனைவியின் கோரிக்கையை உயர் நீதிமன்றம் ஏற்க மறுத்துவிட்டது. ஏனெனில், அவர் தனது கடன்கள் தொடர்பான எந்த ஆவணங்களையும் சமர்ப்பிக்கவில்லை. மேலும், மாதத்திற்கு சுமார் ரூ.1.64 லட்சம் மனைவியும், சுமார் ரூ.60,000 கணவனும் சம்பாதிப்பதையும் நீதிபதி சுட்டிக்காட்டினார்.
